Amsterdam, Basra, Jańa Orlean, Venesıa, Hoshımın jáne Kalkýtta qalalaryn sý basýy múmkin
Klımattyń ózgerýinen aldaǵy on jylda álemniń ár túkpirindegi alty qala sý astynda qalýy múmkin. Bul týraly Climate Central táýelsiz uıymynyń derekterine súıene otyryp The India Times basylymy málimdedi, dep habarlaıdy Almaty-akshamy.kz.
Atalǵan uıym Klımattyń ózgerýi jónindegi Úkimetaralyq sarapshylar tobynyń málimeti negizinde ózderiniń boljam kartasyn jasap shyqqan.
Basylymnyń jazýynsha, Amsterdam qalasy teńiz sýynyń kóterilýinen birinshi bolyp sý astynda qalýy múmkin. Odan keıingi kezekte Basra qalasy tur. Ol Iraktaǵy Shatt-ál-Arab ózeniniń jaǵasynda ornalasqan. The India Times basylymynyń túsindirýinshe, qalanyń aınalasy sýly-batpaq. Sondaı-aq AQSH-tyń Lýızıana shtatyndaǵy Jańa Orlaen qalasyna da sý astynda qalý qaýipi tónip tur. Tizimniń tórtinshi kezeginde Venesıa ornalasqan. Italıanyń bul qalasynda jer deńgeıi jyl saıyn 2 mm tómendep otyrady eken. Odan keıin Vetnamnyń Hoshımın qalasy tur. Boljamǵa sáıkes qalanyń shyǵys aýdanyn jaqyn mańdaǵy Mekong ózeni basyp qalady. Sonymen qatar Úndistannyń Kalkýtta qalasy da sý astynda qalady dep boljandy.
The India Times basylymynyń paıymdaýynsha, bul tizimdi qurýǵa qorshaǵan ortanyń lastanýynyń qazirgi traektorıasy negiz bolǵan.