Mamandar qymyzdy alkogóldik sýsynǵa jatqyzýǵa bolady deıdi.
Qymyzdyń dámin seziný úshin ony birneshe ret jáne ystyq kúnde iship kórý kerek. Salqyn sýsyn tek sergitip qana qoımaı, sonymen qatar shıratyp alady. Tengri Life birneshe tostaǵan qymyzdan keıin kólikpen júrýge bola ma, anyqtap kórdi, dep habarlaıdy Almaty-akshamy.kz
Dástúrli qymyzdyń negizgi ıngredıenti – bıe súti. Ártúrli ádispen ashytylǵannan keıin (ár aımaqta erekshelenedi) kóptegen qazaqstandyq jaqsy kóretin sýsynǵa aınalady. Naǵyz qymyz paıdaly zattarǵa baı - bul beloktar (2-2,5 paıyz), maılar (1-2 paıyz), vıtamınder (V1 jáne V2, S, bıotın, pantoten jáne folıı qyshqyldary), sút qyshqyly (0,6 -1,2 paıyz), kálsı, fosfor jáne t.b. Qymyzdyń quramyndaǵy mıkroelementter shóldi basýǵa jáne asqazan-ishek joldarynyń buzylǵan mıkroflorasyn qalpyna keltirýge qabiletti.
Aıta ketetin jaıt, qymyzdy alkogóldik sýsynǵa jatqyzýǵa bolady, óıtkeni ártúrli jaǵdaıda spırt mólsheri 4 paıyzǵa deıin jetýi múmkin. Munyń bári onyń qansha ýaqyt saqtalǵanyna, tipti jylqynyń jemi men tuqymyna da baılanysty.
Ashytylǵan sút sýsyny alkotest qurylǵysyna áser ete me jáne ony ishkennen keıin kólik júrgizýge bola ma? Bul saýaldarǵa Almatynyń Psıhıkalyq densaýlyq ortalyǵy mamandary jaýap berdi.
«Qymyzdyń quramyndaǵy alkogól mólsheri ádette ishimdiktegideı joǵary bolmasa da, ol alkotest nátıjesine áser etýi múmkin. Bul ásirese qysqa ýaqyt ishinde kóp mólsherde qymyz ishken jaǵdaıda bolady. Eger kólik júrgizetin bolsańyz nemese baısaldy bolýdy qajet etetin jumystardy oryndaıtyn bolsańyz, jalpy alkogóldik sýsyndardy, sonyń ishinde qymyzdy da ishýden bas tartqan jón. Jolda ózińizdiń jáne basqalardyń qaýipsizdigin qamtamasyz etý úshin erejelerdi saqtaý mańyzdy», - dedi Psıhıkalyq densaýlyq ortalyǵynyń baspasóz qyzmeti ókilderi.