Astana qalasynda polısıa qyzmetkerleri saýda ortalyqtarynda birqatar urlyq jasady degen kúdikpen 30 jastaǵy er adamdy ustady, - dep habarlaıdy Aqshamnews.kz.
Jedel-izdestirý is-sharalary barysynda kúdiktiniń saýda-oıyn-saýyq ortalyqtarynyń birindegi dúkenge satyp alýshy keıpinde kirip, parfúmerıalyq ónimderdi jasyryn túrde urlaǵany anyqtaldy. Erkin qoljetimdilikti paıdalana otyryp, ol vıtrınadan eki-ekiden qymbat átir qutylaryn alyp, qaltasyna jasyrǵan kúıi dúkennen esh kedergisiz shyǵyp otyrǵan. Keltirilgen jalpy materıaldyq shyǵyn shamamen 300 myń teńgeni qurady. Tergeý barysynda urlanǵan taýarlardy kúdiktiniń keıin satyp jibergeni belgili boldy. Jedel ýákilder er adamnyń jeke basyn beınebaqylaý kameralarynyń jazbalary arqyly anyqtap, ony sol aýdan aýmaǵynda ustady.
Sonymen qatar, polısıa onyń qatysy bolýy múmkin taǵy úsh uqsas urlyq deregin tirkedi. Atalǵan faktiler boıynsha tekserý júrgizilýde. Polısıa azamattar men saýda nysandarynyń ókilderine qaýipsizdik sharalaryn saqtaýdyń mańyzdylyǵyn eske salady. Atap aıtqanda, kelýshilerdiń kúmándi áreketterine nazar aýdarý, taýarlardyń saqtalýyn baqylaýdy kúsheıtý, sondaı-aq anyqtalǵan quqyq buzýshylyqtar týraly polısıaǵa der kezinde habarlaý usynylady.