Almatyda 2040 jylǵa deıingi qalanyń Bas josparyn túzetý boıynsha qoǵamdyq tyńdaýlar aıasynda «Batys» polıortalyǵyn damytý tujyrymdamasy tanystyryldy, - dep habarlaıdy Aqshamnews.kz.
Talqylaýdyń úshinshi kúni «Almatybasjospar» ǵylymı-zertteý ınstıtýtynyń dırektory Asqat Sádýov «Almaty-3» jańa temirjol vokzaly ornalasqan aýdan men Boraldaı kentindegi kólik-logıstıka torabyn zamanaýı qala klasterine qalaı aınaldyrý josparlanyp otyrǵanyn aıtyp berdi. Munda ekologıalyq óndirister, jumys oryndary, jasyl aımaqtar men damyǵan áleýmettik ınfraqurylym qarastyrylǵan.
Asqat Sádýovtyń aıtýynsha, «Batys» polıortalyǵy Almatynyń ósýindegi negizgi núktelerdiń biri bolyp, zamanaýı óndiris, logıstıka jáne qoǵamdyq keńistikterdi damytýǵa baǵyttalady. Bul aımaqta 1-Almaty ındýstrıalyq aımaǵyn, farmasevtıkalyq óndiristerdi ornalastyrý, sondaı-aq «Saq qorǵandary» mańynda rekreasıalyq park salý josparlanǵan.
«Biz negizgi qalalyq fýnksıalardy jasyl qańqa men ózgerister aýqymyn eskere otyryp, barynsha tıimdi qaıta bólýdi kózdedik. «Batys» polıortalyǵy qalanyń basqa bólikterimen jyldam relsti kólik arqyly baılanysady», – dedi Asqat Sádýov.
Jobanyń negizgi maqsattarynyń biri – ekologıalyq óndiristi damytý jáne zıandy kásiporyndardy kezeń-kezeńimen turǵyn aımaqtardan tys aýmaqqa kóshirý. Bul aımaqta ómir súrýge jáne jumys isteýge qajetti tolyqqandy ınfraqurylym qalyptastyrý kózdelgen. Polıortalyqta LRT deposy, syzyqty rekreasıalyq saıabaq pen kópsalaly aýrýhana kesheni paıda bolady.
«Bul jerde ınjenerlik te, áleýmettik te jaǵynan sapaly naqty ınfraqurylym bolǵanyn qalaımyz. Bul jaryqtandyrylǵan, qaýipsiz ári áleýmettik belsendi keńistikter, olar turǵyndardyń qajettilikterine qyzmet etýge tıis», – dedi ol.
«Joba aıasynda ashyq qoǵamdyq keńistikter men mańyzdy nysandarǵa baǵyttalǵan kórinisti saqtaý máselesine basymdyq berilgen.
«Biz úshin qalanyń túrli núktelerinen kórneki nysandar men qalalyq ortanyń burynnan ornyqqan elementteri aıqyn kórinip turýy asa mańyzdy. Saıabaq polıortalyqtyń júregine aınalady – bul qorshaýsyz, táýlik boıy, aptanyń 7 kúni qoljetimdi ashyq qoǵamdyq keńistik. Biz kórinis dálizderin, mysaly, meshit sıaqty qoldanystaǵy ınfraqurylym nysandaryna arnaıy baǵyttadyq. Mundaı elementterdi qalyptasqan ortaǵa saýatty túrde engizý mańyzdy», — dedi Asqat Sádýov.
Jalpy, «Batys» polıortalyǵynyń tujyrymdamasy qalalyq ortany qalyptastyrýda landshafttyń basymdyǵyna negizdelgen.
«Qalany sáýletten emes, landshafttan bastap qalyptastyrý óte mańyzdy. Joǵary landshaftyq estetıkasy bar saıabaq ortalyq element retinde jáne sapaly qoǵamdyq keńistikter qurylystyń negizine aınalýǵa tıis», — dedi Asqat Sádýov.
Almatynyń 2040 jylǵa deıingi Bas josparyna túzetýler engizý boıynsha qoǵamdyq tyńdaýlar jalǵasýda. Qala turǵyndarynyń usynystary qujatty ári qaraı pysyqtaý kezinde eskeriledi.