Eńbek adamy
Almaty – Qazaqstannyń eń iri jáne halyq tyǵyz ornalasqan qalalarynyń biri. Munda kúndelikti tirshilik qarbalas, al tótenshe jaǵdaılar qyzmeti árdaıym saqadaı saı bolýy tıis. Osy mindetti abyroımen atqaryp júrgen Almaty qalasy Tótenshe jaǵdaılar departamentiniń qyzmetkerleri arasynda erekshe eńbekqorlyq pen kásibılikti boıyna sińirgen Nurlan Atyǵaev syndy erler bar.
Almatydaǵy árbir órt pen tótenshe jaǵdaıdyń aldyn alý, qaýipsizdikti qamtamasyz etý – Nurlan Atyǵaev pen onyń áriptesteriniń basty maqsaty. Jyl saıyn qalada shamamen 600 órt tirkeledi. Departamenttiń 19 órt sóndirý bólimshesi jáne 1,5 myńnan astam qutqarýshy bul jaǵdaılardy tez ári tıimdi joıý úshin úzdiksiz eńbek etedi.
Qazirgi zamanda tehnıkalyq jabdyqtalý qyzmettiń tıimdiligin arttyrýda. Almatynyń órtke qarsy qyzmeti 95%-ǵa qajetti tehnıkalarmen jaraqtanǵan. Sońǵy jyldary qalada órt sóndirý depolary salynyp, avtoparkter jańartyldy. Joǵary qabatty ǵımarattarǵa arnalǵan arnaıy kótergishter men metrodaǵy órtterdi sóndirýge arnalǵan zamanaýı quraldar alynyp, qoldanysqa engizildi.
Sonymen qatar, 1100-den astam beınekameralar arqyly qala aýmaǵynda baqylaý júrgiziledi. Bul júıe tótenshe jaǵdaılardy erte anyqtap, jyldam áreket etýge múmkindik beredi. Al drondar tek taýdaǵy qaýipsizdikti baqylap qoımaı, izdeý-qutqarý jumystarynda da taptyrmas quralǵa aınalǵan.
Nurlan Atyǵaevtyń aıtýynsha, tótenshe jaǵdaılardyń aldyn alý – tek tehnıkalyq jabdyqtar men qutqarýshylardyń jumysy ǵana emes, halyqtyń da jaýapkershiligin talap etedi. Osy maqsatta jeke turǵyn úılerge reıdter uıymdastyrylyp, órt qaýipsizdigi erejeleri týraly túsindirý jumystary júrgiziledi. Mysaly, «Qaýipsizdik úshin – birge» aksıasy aıasynda muqtaj otbasylarǵa pesh tazalaý, tútin murjalaryn jóndeý sıaqty naqty kómek kórsetilip, ýly gazdan qorǵaý úshin arnaıy qurylǵylar ornatyldy.
Nurlan Atyǵaevtyń basshylyǵymen júzege asyrylyp jatqan jumystardyń nátıjesinde Almatyda tótenshe jaǵdaılardyń deńgeıi azaıyp, qaýipsizdik mádenıeti jaqsaryp keledi. Ol óz salasyna barynsha adal qyzmet etýmen qatar, ujymyna úlgi bolyp, jas mamandardy tárbıeleýde úlken eńbek sińirýde.
Almatynyń árbir turǵyny men qonaǵynyń qaýipsizdigi úshin kúndiz-túni aıanbaı qyzmet etip júrgen Nurlan Atyǵaev pen onyń áriptesterine alǵysymyz sheksiz. Osyndaı eńbek adamdarynyń arqasynda alyp shahardyń tynyshtyǵy men qaýipsizdigi qamtamasyz etilýde.