Memleket basshysy Qasym-Jomart Kemeluly Toqaev keshegi Joldaýynda ómirdiń, qoǵamnyń barlyq salasyn túgel qamtydy. Jan-jaqty saralap, olardyń sheshý joldaryn kórsetip berdi.
Jasyratyny joq, búkil jahandy ýysynda ustap turǵan koronavırýs indeti bizdi ómir súrý daǵdymyzdan biraz jańyldyryp, kóp salaǵa kóleńkesin túsirgeni ras. Eńsemizdi endi tiktep jatqandaımyz. Degenmen áli de burynǵy mamyrajaı, qalypty kúnderimizge erkin orala almaı otyrmyz.
«Aldaǵy ýaqytta álemde koronavırýstyń jańa shtamdary shyǵýy múmkin. Sarapshylar basqa indetter paıda bolatyndyǵyn aıtýda. Biz onyń qashan bolatyndyǵyn kútip qarap otyra almaımyz. Osyndaı jaǵdaıda ómir súrýge, ári qaraı damýǵa beıimdelýimiz kerek. Qazir bizge kerek vaksınany satyp alý óte mańyzdy. Dúnıejúzilik densaýlyq saqtaý uıymynda tirkelgen vaksınalardy tezirek satyp alý qajet. Sonymen birge búkil densaýlyq saqtaý salasyn turaqty ekpe alý júıesine daıyndaǵan jón», – dedi Memleket basshysy.
Sonymen qatar, elimizdiń bıologıalyq qaýipsizdigin boljaýmen aınalysatyn ulttyq júıe qurylýǵa tıis dedi.
«Bul is-shara tıisti zań jobasynda qarastyrylǵan. Parlamentten osy zań jobasyn qazirgi sesıanyń sońyna deıin qabyldaýdy suraımyn. Medısınalyq saraptama jasaıtyn kóptegen zerthanamyz halyqaralyq standartqa saı emes. Densaýlyq ult jobasy boıynsha keminde 12 zerthanany joǵary tehnologıalyq quralmen jabdyqtaý qajet. Sonyń arqasynda zerthanalarymyz 90 paıyzǵa deıin halyqaralyq talapqa saı jumys isteıtin bolady», – dedi Memleket basshysy.
Prezıdent medısına ónimderin zerthanalyq jáne tehnıkalyq synaqtan ótkizetin ortalyq qurý kerektigin de atap ótti.
«Farmasevtıka ónerkásibine erekshe kóńil bólý qajet. İndetpen kúres kezinde dál sala elimizdiń básekege qabileti men qaýipsizdigi úshin mańyzdy ekenine kózimiz jetti. Sondyqtan medısına ónimderin zerthanalyq jáne tehnıkalyq synaqtan ótkizetin ortalyq qurýymyz kerek. Jahandyq farmasevtıkalyq korporasıalarmen yntymaqtastyqty jandandyrǵan jón. Investorlardy tartyp, ozyq tehnologıany jáne osy saladaǵy jańa zertteý jumystaryn ıgerýdi qolǵa alý kerek», – degen Memleket basshysy otandyq taýar óndirýshilermen jasalatyn offtake kelisimsharttarynyń kólemin arttyryp, ónim túrin kóbeıtý qajettigin de basa aıtty.
Bizdegi dári-dármek pen medısınalyq qural-jabdyqtyń 17 paıyzy ǵana otandyq ónim. 2025 jyly ony 50 paıyzǵa jetkizý qajettigin tilge tıek etti.
Ult densaýlyǵy myqty bolsa, el de, jer de aman bolady.