Ulytaý oblysynda jumysshy mamandyqtarǵa suranys kúrt artty. Ásirese, qurylysshy, santehnık jáne aspaz sıaqty tehnıkalyq baǵyttaǵy kadrlardyń tapshylyǵy sezilýde. Osyǵan baılanysty bıyl memleket tarapynan tegin bilim alýǵa bólinetin granttar sany edáýir ulǵaıyp otyr.
Jańa oqý jylyna Ulytaý óńirinde jumysshy mamandyqtarǵa 2250 grant qarastyrylǵan. Bul – ótken jylmen salystyrǵanda aıtarlyqtaı joǵary kórsetkish. Qazirdiń ózinde óńirdegi tehnıkalyq jáne kásiptik bilim berý mekemelerinde talapkerlerden qujat qabyldaý naýqany júrip jatyr. Jas mamandar tek bilim alyp qana qoımaı, naqty óndiristik tájirıbeden ótip, jumysqa ornalasýǵa múmkindik alady.
Búgingi tańda óńirdegi 150-den astam kásiporyn men kolejder arasynda áriptestik jóninde memorandým jasaldy. Bul qujattar negizinde stýdentter óndiristik tájirıbeden ótip, keıin jumysqa ornalasý múmkindigine ıe bolady. Bul shara jastardyń mamandyqty ıgerý barysynda naqty daǵdyny meńgerip, eńbek naryǵyna tez beıimdelýin qamtamasyz etedi.
Ulytaý oblysyndaǵy tehnıkalyq jáne kásiptik bilim berý mekemeleriniń materıaldyq-tehnıkalyq bazasy da zaman talabyna saı jańartylyp keledi. Oqý oryndaryna qazirgi zamanǵa laıyqty oqý quraldary men sımýlásıalyq qurylǵylar satyp alynýda. Bul – bilim berý sapasyn arttyryp qana qoımaı, stýdentterdiń tájirıbelik mashyqtaryn jetildirýge septigin tıgizedi.