Kóksheniń kórkem Býrabaıynda Prezıdent Qasym-Jomart Toqaevtyń qatysýymen Ulttyq quryltaıdyń 4-otyrysy ótti. Quryltaıdyń Bilim jáne ǵylym seksıasynda qoǵamdy mazalaǵan kóp másele kóterildi. Sonyń ishinde jańa qurylǵan Prezıdent janyndaǵy Ulttyq Ǵylym akademıasynyń bolashaǵy, qoǵamdaǵy memlekettik tildiń qoldanysy, til bilý deńgeıi men mádenıetine qatysty talqylaý qyzý júrdi. Seksıa qatysýshylary ár másele jóninde óz usynysyn aıtty.
Quryltaı aldy ótken keńestegi usynystardyń oryndalý barysy, ǵylym men joǵary bilim salasyn ozyq halyqaralyq bilim berý júıesimen qurmalastyrý jolyndaǵy bastamalar men qarqyndy ister týraly Ǵylym jáne joǵary bilim mınıstri Saıasat Nurbektiń jan-jaqty baıandamasy qoǵam belsendileriniń kóńilinen shyqty.
Osy otyrystan memlekettik til týraly pikirtalasqa qatysyp, ǵylymı-zertteý ınstıtýttarynyń áleýetin nyǵaıtýǵa qatysty usynysymdy aıttym.
1. Joǵarǵy oqý oryndarynyń sheteldik ǵalymdar men ǵylymı ortalyqtarmen baılanysyn kúsheıtý jumystary óte qarqyndy júrip jatyr. Bul qýantady. Ǵylymı-zertteý ınstıtýttary jańa ǵylymı baǵyttardy ashyp, zertteý júrgizýi úshin de sheteldik ǵylymı ortalyqtardaǵy qysqamerzimdi taǵylymdamanyń, sonymen birge sheteldik ǵalymdardy arnaıy kýrstar ótkizýge, trenıńter ótkizýge Instıtýtqa shaqyrýdyń mańyzy zor bolyp tur. Mysaly, biz Instıtýtta psıholıngvıstıka bólimin ashtyq. Bólim mamandary osy salada óz zertteýlerin tyńnan bastap júrgizip otyr deýge bolady. Al bul baǵytta biraz jetistikke jetken sheteldik ǵalymdardy ujymǵa shaqyryp, nemese bólim mamandaryn qysqamerzimdi taǵlymdamaǵa jiberse - biraz bilim, bilik, daǵdymyzdy jetildirer edi. Osyǵan oraı naqty tetikter men maqsattalǵan qarjy kózderi oılastyrylsa jaqsy bolar edi. Ǵylymı-zertteý ınstıtýttary ózderi konkýrstan utyp alǵan baǵdarlamalyq-nysanalyq qarjylandyrý jáne granttyq zertteý jobalary boıynsha ǵana osyndaı múmkindikke bola alady, sondyqtan olardyń konkýrstyq qujattamasynda atalǵan máseleler eskerilse degen usynys.
2. Qandaı da bir kúrdeli máseleni sheshetin mamandandyrylǵan komısıalardy qurýda sol máselege arnalǵan monografıalardyń, ǴJBSSQK bazasyndaǵy jýrnaldaǵy maqalalalardyń, sonymen birge skopýs, Web of Science bazasyndaǵy jýrnaldaǵy maqalalardyń bolýy nemese basqa da ǵylymı basylymda ǵylymı jarıalanymy, másele boıynsha zertteýmen aınalysqanyn rastaıtyn ǵylymı dáıekti eńbegi bolýy sol mamandandyrylǵan jumys toby múshesiniń basty talaby retinde qaralýy utymdy bolar edi. Olaı bolmaǵan jaǵdaıda, salalyq komısıa jumysy birden kózdegen nátıjege jete almaı qalýy ábden múmkin.