Qurban aıt qarsańynda elimizde mal saýdasy qyzyp, naryqta baǵalar ógeredi. Osy oraıda Maltabu.kz platformasyna taldaý jasap, aıt merekesine deıin jáne keıin baǵanyń qalaı qubylǵanyn saralap kórdik. 

Aıt qarsańynda Naýryzbaı qajy Taǵanuly mal qunyn qoldan kótermeı, halyqqa qoljetimdi baǵaǵa satýǵa shaqyrǵan edi. 

"Qurban aıtta halyqqa jaqsylyq jasap, kópshiliktiń alǵysyn alaıyq. Bul – saýapty ári saǵynyshpen keletin meıram", dedi Naýryzbaı qajy Taǵanuly.

Alaıda Aıt aldyndaǵy apta suranys qandaı boldy?

Maltabu.kz platformasynda jarıalanǵan satylymdar boıynsha, Qurban aıtqa deıingi on kún ishinde qoı, eshki men sıyr baǵalary orta eseppen 15-20 paıyzǵa deıin óskeni baıqaldy.

• Qoı: mamyrdyń ortasynda ortasha baǵasy 55 000 teńge bolsa, aıt qarsańynda 65 000 teńgege deıin jetken;

• Sıyr: maýsym basynda shamamen 350 000 teńge bolsa, mereke aldynda 400 000 teńgege deıin ósken.

Keıbir óńirlerde asyl tuqymdy maldar men iri qoshqarlardyń baǵasy 1,5 esege deıin qymbattaǵan.

Al 5 maýsymda mal baǵasy ósip ketken. 

Bul týraly Nurlan ımam ne deıdi? 

"Birinshiden, naryq eshkimge, eshteńege táýeldi emes, ol naqty bir qurylǵan damý dınamıkasymen júredi. Teńge tıynnan quralǵandaı, baǵanyń tómendeýi nemese sharyqtaýy kún saıyn kóz aldymyzda júrip jatyr, tek ony ózimiz baıqamaımyz. Ekinshiden, dinı merekeler kezeńinde naryqty qadaǵalaý ımam-moldalardyń mindeti emes, ony qadaǵalaıtyn arnaıy antı monopolıalyq qyzmetter bar. Úshinshiden, qurbandyq Qudaıǵa jaqyndaý, ıaǵnı qaı amalymyz ótedi, másele sonda. Boıymyzda eń jaman qyryq qasıettiń birnesheýi bolsa, mysaly, tákapparlyq, maqtanshaqtyq, ótirik aıtý, jalǵan sóıleý jáne taǵy basqa, oǵan qoıdyń ne kinási bar? Mine, naǵyz qurbandyq osy Qurban aıtta, ıaǵnı osy jamandardy qurban etý –  Allaǵa jaǵatyn is. Odan keıin biz nege saýapty tek as berý, mal shalýdan izdeımiz. Jánnattyń esigin jaqsy minez ashatyn bolsa, jaqsy nıet, jaqsy peıil, jaqsy qarym-qatynas jaqsy minezdi qalyptastyrady, ıaǵnı saýap naq ózimizde, ishki dúnıemizde, tek jaryqqa shyǵar dúnıe peıil", - deıdi ol. 

Qurban aıt kezinde qurbandyq shalatyn oryndar:

Almatynyń jeti aýdanynda osyǵan oraı úlken meshitterge jaqyn jerde qurban shalatyn 12 arnaýly oryn ashyldy. Qalanyń bas ımamy Tólebı Ospan men Din isteri basqarmasynyń bólim basshysy Dosqan Rahmetildaev  Almaty qalasynyń Óńirlik komýnıkasıalar qyzmetinde osylaı dep habarlady.  
 
6 maýsymda tańǵy saǵat 06:00-de qalanyń 56 meshitinde Aıt namazy oqylady. Namazdan keıin birden qurbandyq shalý rásimi bastalady.

Almatydaǵy qurban shalý ruqsat etilgen oryndardyń tizimi:
 
Alataý aýdany boıynsha:
1. "Myrzahmet" meshiti. Qarasý sh/a, Soltústik aınalma joly kóshesi, 15.
2. "Ásker ata" meshiti. Aıgerim-1 sh/a, Benberın kóshesi, 18/4.
3. "Alǵabas" meshiti. Alǵabas sh/a, Saıgúbe kóshesi, 6.
 
Bostandyq aýdany boıynsha:
1. "Baqytkeldi" meshiti. Han-Táńiri sh/a, Dýlatı kóshesi, 27/11.
 
Medeý aýdany boıynsha:
1. "Omar ıbn ál-Hattab" meshiti. Jýkov kóshesi, 136 A.
2. "Amanqul ata" meshiti. T. Bıgeldınov kóshesi, 5.
3. "Fatıma" meshiti. Sh. Jánibek kóshesi, 148.
4. "Raıymbek batyr" meshiti. Dýman-1 sh/a, Han Táńiri kóshesi, 15.
5. "Arafat" meshiti. Ibragımov kóshesi, 5 A.
 
Naýryzbaı aýdany boıynsha:
1. "Qalqaman-2" meshiti. Qalqaman-2 sh/a, Aspandıarov kóshesi, 84.
 
Túrksib aýdany boıynsha:
1. "Qaırat" meshiti. Qaırat sh/a, Sarymoldaev kóshesi, 22.
 
Jetisý aýdany boıynsha:
1. "Ál-Mádına" meshiti. Fedorov kóshesi, 12.

Onlaın qurban shalý jaıly neni bilýimiz kerek? 

Onlaın qurban shalý úshin azamattarǵa arnaıy qurban.muftyat.kz saıty ashylǵan. Saıttan qarajatyńyzǵa qaraı usaq nemese iri qara mal tańdap, bank arqyly tólem jasasańyz jetkilikti. Qoı men eshki — jeke adamǵa, al sıyr men túıeni — bir adam nemese jeti adamnyń birigýimen shalýǵa ruqsat.

Tapsyrys sátti rásimdelgen soń tapsyrys berýshige SMS habarlama jiberiledi. Qurban shalynǵan soń foto jáne beıneesep uıaly telefon nómirine joldanady. Qurbandyq eti túgeldeı muqtaj jandarǵa jetkiziledi.