Almaty qalasy İshki saıasat basqarmasynyń qoldaýymen Social project management ortalyǵy «Zań keńesi» jobasy aıasynda dóńgelek ústel ótkizdi, - dep habarlaıdy Aqshamnews.kz.
Onyń maqsaty - Memleket basshysy Qasym-Jomart Toqaevtyń Joldaýynda kórsetilgen «Zań jáne tártip» qaǵıdatyn ornyqtyrý.
Dóńgelek ústelge zańgerler, quqyq qorǵaýshylar, memlekettik jáne quqyq qorǵaý organdary, úkimettik emes uıym ókilderi, qala turǵyndary, jastar qatysty.
«Zań keńesi» jobasynyń basty zańgeri Qýat Aýǵanbek búgingi deıin turǵyndarǵa qandaı kómek kórsetilgenin aıtty.
- Almatyda «Zań keńesi» jobasy 3 jyldan beri jalǵasyp kele jatyr. Ol almatylyqtardyń quqyqtyq saýattylyǵyn arttyrý, áleýmettik osal toptaǵy azamattarǵa zań turǵysynan keńes berip, tegin kómektesýdi kózdeıdi. Osy ýaqyt aralyǵynda myńǵa jýyq adamǵa quqyqtyq turǵyda baǵyt-baǵdar berdik. Bul joba memleket tarapynan azamattarymyzǵa úlken qoldaý dep bilemiz, - dedi ol.
Social project management ortalyǵynyń dırektory Beıbit Moldahmetuly qoǵamda quqyqtyq sana ósip jatqanyn aıtty.
- Zań organdaryna júginetinderdiń qarasy kóbeıgen. Mysaly, 1 jylda sotqa aryz túsiretinder sany 3 ese kóbeıgen. Iaǵnı, adamdar ózara kıkiljińdi sot arqyly zań aıasynda sheshýge kóshken. Ol quqyqtyq sananyń ósip jatqanyn kórsetedi. Al bizdiń maqsatymyz osy ósip jatqan sanaǵa serpin berý, - dedi ol.
Sonymen qatar Beıbit Moldahmetuly qala turǵyndary ortalyqqa qandaı suraqtar boıynsha jıi júginetinin atap ótti.
- Azamattar kóbine qandaı másele boıynsha qaı organǵa ótinish ne shaǵym jazý kerek ekenin bilmeıdi. Osy jaǵynan bizdiń zańgerler keńes beredi. Alıment óndirý máselesi jıi qozǵalady. Sondaı-aq, ótkir suraqtar ishinde jer daýy bar. Odan bólek kelisimshartsyz bir is-áreket jasap qoıatyndar kóp. Aýyzsha kelisim jasalady da, keıin qaryzyn qaıtarmaı qoıady degen sekildi. Al zańgerler kelisimshart bar kezde ǵana zań kúshin qoldana alady. Sonda da bizdiń zańgerler messendjerlerdegi hat almasý arqyly jábirlenýshige kómektesýge tyrysady, - dedi Beıbit Moldahmetuly.