27 naýryzda alqabılerdiń qatysýymen Qýandyq Bıshimbaev pen onyń týysy Baqytjan Baıjanovqa qatysty qylmystyq is boıynsha sot talqylaýy ótedi. Sot prosesi jabyq rejımde ótedi, dep habarlaıdy almaty-akshamy.kz
Astana sotynyń baspasóz qyzmetiniń habarlaýynsha alqabıler quramy 27 naýryzda irikteledi. Zańger Áıgerim Qusaıynqyzy Bıshimbaevtyń alqabıler sotyna júginýin «aqtalýǵa degen umtylys» dep sanaıdy. Sarapshynyń aıtýynsha, qoldanystaǵy tájirıbede alqabıler sotynda qaralǵan isterdiń aqtalý yqtımaldyǵy bes ese joǵary.
Qazaqstan Respýblıkasynyń 75-babynyń 2-tarmaǵyna sáıkes zańda kózdelgen jaǵdaıda qylmystyq proses alqa bılerdiń qatysýymen ótedi. Iaǵnı, alqabıler sotyna júginý kez kelgen Qazaqstan azamatynyń konstıtýsıalyq quqyǵy. Bıshimbaev myrza konstıtýsıalyq quqyǵyna silteme jasaý arqyly atalǵan iske jarıalylyq sıpat bergisi kelgen tárizdi. Birinshi kúni-aq ol ózine taǵylǵan kináni moıyndamaǵandyqtan, «meniń kinásiz ekendigimdi búkil halyq kórsin» dep aıtqysy kelgen tárizdi. Sonymen qatar aqtalýǵa degen umtylys dep oılaımyn. Sebebi Qazaqstandaǵy alqabıler sotynyń aqtaý kórsetkishi 10 paıyz. Al jalpy sottarda bul kórsetkish 1,5-2 paıyz. Iaǵnı, alqabıler sotynda qaralǵan istiń aqtalý yqtımaldyǵy 5 ese joǵary degen sóz. Zań oǵan múmkindik berip otyr, – deıdi zańger.