QR Premer-Mınıstri Asqar Mamınniń tóraǵalyǵymen ótken Investısıalyq shtab otyrysynda 2021 jylǵy qańtar-mamyrdaǵy ınvestısıalardy tartý boıynsha atqarylǵan jumystyń qorytyndy kórsetkishteri qaraldy, dep habarlady Almaty-akshamy.kz QR Premer-mınıstrdiń saıtyndaǵy habarǵa silteme jasap.
Ulttyq ekonomıka mınıstri Áset Erǵalıev osy jyldyń 5 aıynda taý-ken óndirisi ónerkásibin qospaǵanda, negizgi kapıtalǵa salynǵan ınvestısıalar kólemi 25,5% deńgeıinde óskenin aıtty. Mınıstr bıylǵy 5 aıdyń nátıjeleri boıynsha, QR ekonomıkasynyń qalpyna kelý traektorıasyna shyǵýy aıasynda negizgi kapıtalǵa salynǵan ınvestısıalar aǵynynyń joǵary qarqyny qurylys (+132%), óńdeý ónerkásibi (+82%), aqparat jáne baılanys (+55%), aýyl sharýashylyǵy (+47%), saýda (+49%), jyljymaıtyn múlik operasıalary (+30%), kólik jáne qoımalaý (+20%) sekildi salalarda baıqalǵanyn atap ótti. Óńdeý sektorynyń qurylymynda hımıa ónerkásibine ınvestısıalardyń ósýi 130 mlrd teńgeni (+427%), metalýrgıaǵa 50 mlrd teńgeni (+41%) jáne t. b. qurady. Negizgi kapıtalǵa salynǵan ınvestısıalar boıynsha oń ósim qarqynyna 15 óńirde jáne respýblıkalyq mańyzy bar qalalarda qol jetkizildi. Kósh bastap turǵan óńirler Túrkistan (+39,1%) jáne Pavlodar (+38,5%) oblystary, Almaty (+36,1%), Nur-Sultan (+34,8%) jáne Shymkent (+25,6%) qalalary, Soltústik Qazaqstan (+24,6%), Jambyl (+24,3%) jáne Qaraǵandy (+21,6%) oblystary boldy. Artta qalýshylyq Batys Qazaqstan (-36,4%) jáne Atyraý (-35%) oblystarynda baıqalady. «Kazakh Invest» UK» AQ basqarma tóraǵasy Meıirjan Iýsýpov qazirgi tańda «Task Force» $9 mlrd astam somaǵa 36 jobany pysyqtap jatqanyn aıtty. Qosymsha 15 joba qarastyrylyp jatyr.
Atyraý oblysynyń ákimi Mahambet Dosmuhambetov 2021-2025 jyldarǵa ákimdik AÓK, jańartylatyn energetıka, farmasevtıka, munaı-gaz hımıasy ónerkásibi, týrızm, bilim berý jáne t. b. salalarda 12 myńnan astam jumys ornyn qura otyryp, jalpy somasy 10,1 trln teńge bolatyn 110 ınvestısıalyq jobadan turatyn pýl qalyptastyrǵanyn baıandady. Bıyl óńirde ınvestısıalyq jobalardy iske asyrýǵa 3,8 trln teńge ınvestısıa tartý josparlanǵan. Osy jyldyń 5 aıynda negizgi kapıtalǵa salynǵan ınvestısıalar kólemi 1 trln teńgeni qurady. Qyzylorda oblysynyń ákimi Gúlshara Ábdiqalyqova aldaǵy 5 jylǵa ákimdik AÓK, kólik, jańartylatyn energetıka, jeńil ónerkásip, sıfrlandyrý, densaýlyq saqtaý, TMK jáne t. b. salalarda 889 mlrd teńge somasyna 177 jobadan turatyn pýl qalyptastyrǵanyn atap ótti. Qazirgi ýaqytta jalpy quny 476 mlrd teńge bolatyn 132 joba iske asyrylýda. Osy jyldyń sońyna deıin jalpy quny 56 mlrd teńge bolatyn, óńirdiń 10 negizgi ınvestısıalyq jobasynyń 6-yn paıdalanýǵa berý josparlanǵan, atap aıtsaq – shyny zaýyty, as tuzyn óndirý, qus fabrıkasy, jońyshqa ósirý, túıe sútinen qurǵaq untaq óndirý, kún elektr stansıasy (osy jylǵy naýryz aıynda paıdalanýǵa berildi). Úkimet basshysy barlyq memlekettik organǵa, óńirlerdiń ákimdikterine jáne kvazımemlekettik sektor sýbektilerine ishki jáne syrtqy ınvestısıalardy tartý jumysyn júıeli negizde jalǵastyrýdy tapsyrdy.