QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda eldegi sanıtarlyq-epıdemıologıalyq jaǵdaı qaraldy
Densaýlyq saqtaý mınıstri Ajar Ǵınıat eldegi sanıtarlyq-epıdemıologıalyq ahýaldyń nasharlaǵany týraly baıandady, dep habarlaıdy Almaty-akshamy.kz Rrimeminister.kz-ke silteme jasap
«Qyzyl aımaqqa» ótken Nur-Sultan, Almaty, Shymkent qalalarynda jáne Atyraý oblysynda koronavırýs ınfeksıasymen syrqattanýdyń kúrt óskeni baıqalady. Aqtóbe, Batys Qazaqstan, Qaraǵandy, Qyzylorda, Pavlodar jáne Mańǵystaý oblystary «sary aımaqta» ornalasqan. Búgingi tańda 9,4 mln astam adam vaksınanyń birinshi komponentin, 8,7 mln-nan astam adam ekinshi komponentin aldy. 670 myńǵa jýyq adam revaksınalaýdan ótti.
«Bizdiń negizgi mindetimiz – epıdemıologıalyq ahýaldy baqylaýda ustaý. Halyqtyń sanıtarıalyq-epıdemıologıalyq talaptardy saqtaýy boıynsha sharalardy kúsheıtý qajet», - dedi Á. Smaıylov.
Úkimet basshysy Densaýlyq saqtaý mınıstrligine, ákimdikterge PTR-testileý sanyn ulǵaıtýdy, jedel monıtorıń júrgizip, medısına qyzmetkerleri men aýrýhanalarda rezervtik oryndardyń daıarlyǵyn qamtamasyz etýdi, sondaı-aq dári-dármek pen medısınalyq buıymdardyń jetkilikti bolýyn qadaǵalaýdy tapsyrdy. Premer-Mınıstr úıde medısınalyq kómek kórsetý úshin mobıldi brıgadalardyń jumysyn jandandyryp, olardy tegin dári-dármekpen qamtamasyz etý qajet ekenin, sonymen qatar dárihanalarda dári-dármektiń tapshylyǵyna jol bermeý sharalaryn qabyldaý qajettigin atap ótti. Á. Smaıylov Densaýlyq saqtaý mınıstrligi men ákimdikterge halyqty revaksınalaý qarqynyn edáýir arttyrýdy tapsyrdy. Óńirlerdiń ákimderi bul máseleni jeke baqylaýyna alýy tıis. Úkimet basshysy elimizdiń barlyq medısına qyzmetkerlerine rızashylyǵyn bildirdi.
«El úshin syn saǵatta olar zardap shekkender men jaralanǵandarǵa táýlik boıy kómek kórsetip jatyr. Dárigerler aýrýhanalar men "jedel járdem" kólikterin basyp alǵan lańkesterdiń agresıasyn bastan keshirdi. Qurmetti medısına qyzmetkerleri, sizderge eńbekterińiz ben batyldyq tanytqandaryńyz úshin, kez kelgen jaǵdaıda halyqqa kómek kórsetýge ázirlikterińiz úshin alǵys aıtamyz!» - dep túıindedi Á. Smaıylov.