Bul týraly Óńirlik komýnıkasıalar qyzmeti alańynda İİM Almaty akademıasy basshysynyń orynbasary, polısıa polkovnıgi Erjan Bımoldanov habarlady.
65 jyldyq tarıhy bar akademıanyń ishki ister organdarynyń kásibı mamandaryn daıyndaıtynyn atap ótken jón. Kelesi oqý jylynda akademıaǵa konkýrstyq negizde bakalavrıat baǵdarlamalary boıynsha 300 kýrsant, 25 magıstrant jáne 10 doktorant qabyldaý jospary bar, dep habarlaıdy Almaty-akshamy.kz.
Oqýǵa túsýge 16 jastan 25 jasqa deıingi, bilimi ortadan tómen emes, fızıkalyq daıyndyǵy bar Qazaqstan Respýblıkasynyń azamattary úmitker bola alady.
«Oqýǵa túsýge qatysty barlyq suraqtar boıynsha turǵylyqty jeri boıynsha polısıa basqarmalarynyń aýdandyq (qalalyq) bólimderine nemese tikeleı Almaty akademıasyna habarlasý qajet. Úmitker medısınalyq komısıadan, dene shynyqtyrý daıyndyǵy boıynsha synaqtardan ótýi, UBT nátıjesi 50 upaıdan kem bolmaýy tıis», — dedi E.Bımoldanov.
Akademıada oqý úsh tilde júrgiziledi, oqytý barysyna belgili ǵalymdar, halyqaralyq sarapshylar men tájirıbeli qyzmetkerler tartylǵan.
QR İİM Almaty Akademıasy basshysynyń orynbasary vedimistik joǵary oqý ornynda bilim alýdyń artyqshylyqtaryna toqtaldy. Máselen, munda olar jaı ǵana ofıserler emes, aqparattyq-kommýnıkasıalyq tehnologıalar, krımınaldyq polısıa, uıymdasqan qylmys, kıberqylmys, esirtki bıznesi, ekstremızm jáne IT-krımınalıstıka salasyndaǵy mamandardy daıyndaıdy. Sonymen qatar, Akademıa arnaıy jasaq ofıserlerin daıarlaýdyń avtorlyq baǵdarlamasyn ázirledi.
Sonymen qatar, mamandandyrylǵan ýnıversıtet bazasynda kıberzerthana ashyldy, ol qazirgi jáne bolashaq qyzmetkerlerdi ınternet arqyly jasalatyn qylmyspen kúresý boıynsha jumys daǵdylaryna úıretýdiń tıimdi alańyna aınaldy.
Qazaqstan Respýblıkasy İİM Almaty Akademıasy tegin bilim alyp, jaıly jataqhanada turýdy qamtamasyz etedi. Sondaı-aq artyqshylyqtar qatarynda tegin tamaq, formalyq kıim, medısınalyq qyzmet kórsetý, turǵylyqty jerine barý jáne keri qaıtarý (poıyzben) kiredi. Kýrsanttar shákirtaqy alady. Oqý merzimi merzimdi áskerı qyzmet ótkerýmen teń. Akademıa tolyq oqý kýrsyn aıaqtaǵan túlekterdi jumysqa ornalastyrýǵa kepildik beredi.
Oqýdy aıaqtaǵannan keıin bitirýshilerge «Ulttyq qaýipsizdik jáne áskerı ister bakalavry» jáne «Kıberqaýipsizdikti qamtamasyz etý salasyndaǵy bakalavr» biliktilikteri bar memlekettik úlgidegi dıplom beriledi, sonymen qatar «polısıa leıtenanty» arnaıy ataǵy beriledi.