Qazaqstandyqtar QR arqyly memlekettik qyzmetter aqysyn 700 myńnan astam ret tóledi
Ótken jyly «Azamattarǵa arnalǵan úkimet» memlekettik korporasıasy Kaspi jáne Halyq Bank-pen birlesip, HQO-larda memlekettik bajdy QR kómegimen tóleý servısin engizdi. Bir jyl ishinde qazaqstandyqtar QR kodty 700 myńnan astam ret suratyp, 2,8 mlrd teńgeden astam somaǵa tólem jasaǵan, dep habarlaıdy Almaty-akshamy.kz 24.kz-ke silteme jasap.
QR tólemdi belsendi qoldanǵandardyń ishinde Almaty qalasynyń turǵyndary kósh bastap tur, ekinshi orynda qaraǵandylyqtar, odan keıin tizimde astanalyq turǵyndar (tıisinshe 72 052, 63 278, 54 354). QR kodtyń kómegimen memlekettik qyzmetterdiń baj alymyn eń az tólegender Atyraý men Soltústik Qazaqstan oblysyndaǵylar (23 080 jáne 23 449 ret).
«Servıs engizilgen sátten bastap, biz oń ózgerister baıqap otyrmyz – klıentter ýaqytyn únemdep, operatordyń aldynda otyryp-aq qyzmet aqysyn tólep júr. Kasalardyń júktemesi tómendedi. Sondaı-aq QR kod arqyly tólem jasalǵanda komısıa alynbaıdy. Osynyń barlyǵy bizge taıaý ýaqytta HQO-daǵy kasalardyń sanyn úshten birge deıin qysqartýǵa múmkindik beredi», – dep atap ótti «Azamattarǵa arnalǵan úkimet» memlekettik korporasıasynyń basqarma tóraǵasy Ádil Qojyqov.
Esterińizge sala keteıik, Memleket basshysy 2021 jylǵy qyrkúıektegi joldaýynda memlekettik qyzmetterdi alý kezindegi problemalarǵa nazar aýdaryp, bul prosesterdi tolyǵymen sıfrlandyrýdy tapsyrǵan bolatyn. QR kod arqyly tólem jasaý sıaqty servıster azamattardyń memlekettik qyzmetterdi alý retin jeńildetýge kómektesedi.
Qazir QR kodtyń kómegimen 146 túrli memlekettik qyzmettiń aqysyn tóleýge bolady. Bolashaqta bul tizim tolyqtyrylatyn bolady. QR kod arqyly memlekettik baj alymyn tóleý Kaspi jáne Halyq Homebank mobıldi qosymshalary arqyly qoljetimdi.