Qostanaı oblysynda 74 synyp onlaın oqýǵa kóshti, dep habarlaıdy aqshamnews.kz
Qostanaı aýdanynyń tórt mektebinde tumaý men JRVI-men aýyratyn oqýshylar sanynyń artýyna baılanysty 74 synyp qashyqtan oqýǵa aýystyryldy.
"Synyptar boıynsha aýyrǵan balalardyń jalpy úlesi 30 paıyzdan asty. Osyǵan baılanysty olardy karantınge jiberý týraly buıryqtar shyǵaryldy. Qalǵan synyptar dástúrli formatta oqyp jatyr, biraq pándik kabınetterge barmaı, bir kabınette ǵana bilim alýda. Alaıda, erteńge deıin onlaınǵa kóshken synyptar men mektepter sany artýy múmkin", – dedi Qostanaı aýdany bilim bóliminiń basshysy mindetin atqarýshy Aıgúl Hasanova.
Áleýmettik jelilerde Qostanaıdaǵy ata-analar balalar arasynda syrqattaný kúrt artqanyn aıtyp, oqýdy onlaın formatqa kóshirýdi surap jatyr. Qalada naýqastar sany artqan saıyn jedel járdem shaqyrýlar da kóbeıgen – turǵyndar ádettegiden eki ese jıi habarlasýda.
Júktemeni azaıtý úshin oblystyq jedel járdem ortalyǵynda dárigerlerdiń jumysy kúsheıtildi. Buryn 18 jedel járdem brıgadasy kezekshilik atqarsa, qazir olardyń sany 20-ǵa jetti, aldaǵy ýaqytta taǵy eki brıgada qosylmaq.
Sońǵy aptada Qostanaı oblysynda JRVI-diń 5545 jaǵdaıy tirkelgen. Bul – ótken aptamen salystyrǵanda 1,3 paıyzǵa kóp. Aýyrǵandardyń 55,1 paıyzy – 14 jasqa deıingi balalar (3053 jaǵdaı). 1 jasqa deıingi balalar arasynda – 54 jaǵdaı, júkti áıelder arasynda – 12 jaǵdaı tirkelgen.