Zıankestermen kúreske 31 arnaıy tehnıka jumyldyrylǵan.
Qostanaı oblysynda shegirtkeden 500 gektarǵa jýyq arpa egistigine zalal keldi, dep habarlaıdy Almaty-akshamy.kz
Qostanaı oblysy Jangeldın aýdanyndaǵy «Almas» SHQ basshysy Qaırat Raısov shegirtkelerdiń shapqynshylyǵy týraly aqparatty áleýmettik jeliler arqyly birinshi bolyp taratty. Búgin ol aýyl sharýashylyǵy vıse-mınıstri Ábilqaıyr Tamabekpen birge egistikterdi hımıalyq óńdeý boıynsha is-sharalar ótkiziletin aýdan aýmaǵyn aralap shyqty.
Qaırat Raısovtyń habarlaýynsha, buǵan deıin aıtylǵandaı, 10 myń gektar emes, 500 gektarǵa jýyq arpa egistigine zalal kelgen. Onyń sharýa qojalyǵynyń egistikterinde óńdeý jumystary aıaqtalyp jatyr.
Aıta keteıik, shegirtkelerdiń taralý oshaqtary AÓK memlekettik ınspeksıa komıtetiniń óńirlik bólimsheleriniń is-qımyldarynyń arqasynda jedel túrde joıyldy. Qazirgi ýaqytta óńirde shamamen 260 myń ga nemese josparlanǵan alańnyń 70%-y óńdeldi. Zıankestermen kúreske 31 arnaıy tehnıka jumyldyryldy: onyń ishinde 9 jeldetkish búrikkish, 13 aerozoldi gaz generatory, 6 asa jeńil avıasıalyq keme jáne 3 jeńil ushaq.
Aýyl sharýashylyǵy mınıstrligi tekserilmegen aqparatty taratpaýǵa shaqyrady. Senimdi derekter memlekettik organdardyń resmı ınternet-resýrstarynda jarıalandy.