Májilis spıkeri Erlan Qoshanov úkimetpen ózara is-áreket kezinde jyl saıyn qaıtalanatyn problemalyq máseleler týraly aıtty, dep habarlaıdy aqshamnews.kz
"Ókinishke qaraı, biz zań jobalaryn qaraý barysynda únemi úkimettiń qorytyndysyn uzaq kútýge májbúrmiz. Keıde olardy 7 aıǵa deıin kútemiz. Bul jaıt memleket basshysy bergen tapsyrmalardyń oryndalýyn, halyq kútip otyrǵan mańyzdy zańdardyń ýaqtyly qabyldanýyn kesheýildetedi", - dedi Qoshanov parlament palatalarynyń birlesken otyrysynda.
Budan bólek, qorytyndyda depýtattardyń bastamalaryna qatysty úkimettiń naqty ustanymy bolmaı jatady. Máselen, depýtattar erekshe qorǵalatyn tabıǵı aýmaqtar týraly zań jobasymen jumys barysynda Jer kodeksiniń bir babyna eki túrli kózqarasty qamtıtyn túzetýler daıyndaıdy. Úkimet usynylǵan eki nusqany da qoldaı salady.
Memlekettik organdar qorytyndy jobasyn ázirleýge atústi qaraıdy. Bir palatanyń depýtattary qoldamaǵan túzetýlermen basqa palata kenetten kelisip ketedi.
"Alaıda zań jobasyn ózderi ázirleýdiń ornyna, mınıstrlikter máseleni depýtattardyń túzetýleri arqyly nemese Parlamentke hat jazý arqyly sheshýdi ádetke aınaldyra bastady", - deıdi Qoshanov.
Úkimet reglamentine sáıkes, túzetýlerdi zań jobasyn májiliste talqylaý kezeńinde engizý qajet.
"Biraq mınıstrlikter tarapynan ol normaǵa tym jıi júginý oryn alyp otyr. Keıde ondaı túzetýler tipti jalpy otyrys ótetin kúni kelip túsip jatady.Osy sesıada atalǵan tarmaq boıynsha úkimetten kelip túsken hattar sany eki ese artty. Al bul tarmaq erekshe jaǵdaılarda, memleket basshysynyń shuǵyl tapsyrmalaryna nemese dereý sheshýdi qajet etetin mańyzdy máselelerge ǵana qoldanylýy kerek",- dep atap ótti spıker.
Onyń aıtýynsha, mundaı mańyzdy máseleler úkimet qabyrǵasynda jan-jaqty pysyqtalyp, hat túrinde emes, zań jobasy retinde rásimdelip kelýi tıis.
Búginde depýtattyq saýaldarǵa beriletin jaýaptar da syn kótermeıdi. Osy sesıa barysynda memlekettik organdarǵa 625 saýal joldandy.
"Ár saýaldyń artynda halyqty tolǵandyratyn másele turatyny belgili. Alaıda olarǵa berilgen jaýaptardyń mazmuny men sapasyna kóńil tola bermeıdi. Taǵy da jańa suraqtar týyndatady. Bul jaǵdaı keıde depýtattardy memlekettik organǵa qaıta júginýge májbúr etedi", - dedi Qoshanov.
Kelesi sesıada úkimet músheleri májiliske arnaıy shaqyrylady. Sol kezde spıker aıtqan máseleler jan-jaqty talqylanady.