Abaı jáne ál-Farabı dańǵylyndaǵy jol jóndeý kestege sáıkes júrgizilýde: jumys 60%-ǵa aıaqtald
Almatyda negizgi magıstraldardaǵy jol jóndeý jumystary kestege sáıkes júrgiziledi jáne oqý jyly bastalǵanǵa deıin aıaqtalady. Qazirgi tańda ál-Farabı dańǵylynyń ońtústik jaǵyndaǵy Toraıǵyrov kóshesinen Dostyq dańǵylyna deıingi, Dostyqtan Esentaı ózenindegi kópirge deıingi aýmaqta polımerli asfáltbeton tóseý jumystary aıaqtaldy. Seıfýllın dańǵylyna burylystardy jóndeýge daıyndyq jumystary qolǵa alyndy. Dańǵyldyń ońtústik jaǵynda aldyn ala baqylaý jumystary aıaqtaldy, shilde aıynyń sońyna deıin turaqty jol tańbalary syzyla bastaıdy.
Abaı dańǵylynda eki merdiger uıym jumys isteıdi. Ońtústik jaǵynda jóndeý jumysy aıaqtalyp, Tilendıev kóshesinen Esentaı ózenindegi kópirge deıingi qozǵalys ashyldy. Soltústik jaǵynda Dostyq dańǵylynan Esentaı ózenindegi kópirge deıin polımerli asfáltbeton jabyny tóselgen.
Buǵan qosa, Móńke bı kóshesi men ÚAK aralyǵyndaǵy Saıyn kóshesinde uzyndyǵy 2,8 km-ge deıin ortasha jóndeý aıaqtalýǵa jaqyn.
Jolǵa polımerli asfáltbeton tóseý jumysy bitkesin ortasha jóndeý aıasynda osy kóshelerdiń trotýaryn jóndeý jumystary qarastyrylǵanyn atap ótken jón.
Ári qalada aýdandyq mańyzy bar kósheler jóndelip jatyr, kelisimge sáıkes, qazan aıynyń sońyna deıin aıaqtaý josparlanǵan. Qazir Vahtangov kóshesinde Jandosovtan Lebedevke deıin, Turǵyt Ozal kóshesinde Sátbaevtan Tilendıevke deıin, Aqsaı-1 sh/a-daǵǵy Momyshuly kóshesinen Raıymbek dańǵylyna deıingi jol, Alǵabas, Terekti jáne Rahat shaǵyn aýdandardaǵy birqatar kóshede asfáltbeton tóseý jumystary aıaqtaldy.
Esterińizge sala keteıik, Almatyda magıstraldyq kóshelerdiń jol tósemi jańa tehnologıalardy qoldaný arqyly jóndelip jatyr. Asfáltbeton quramynda polımer qoldanylady. Mundaı qospalar tozýǵa tózimdi, jumsartý temperatýrasy joǵary (65-70 °C), sondyqtan ystyqqa ońaı tótep berip, áldeqaıda uzaǵyraq qyzmet etedi. Qazirgi 5 jyldyń ornyna 8-10 jyl paıdalanýǵa bolady.
Jol jóndeý jumystary 2023 jylǵa josparlanǵan jumystar aıasynda qolǵa alynǵan. Ýaqytsha qolaısyzdyqtar úshin keshirim ótinemiz. Bul qala joldaryn uzaǵyraq paıdalanýǵa qajetti shara. Marshrýtty aldyn ala josparlap alýdy suraımyz.
Jol jóndeý jumystary týraly sońǵy aqparat qala ákimdigi men qalalyq mobıldilik basqarmasynyń resmı paraqshalarynda, https://t.me/AlmatyJoly Telegram arnasynda jáne 2GIS qosymshasynda kórsetilgen.