Qazaqstan Ulttyq banki 2023 jylǵy 1 qyrkúıekte «Dala qazynasy» serıasynan QORQYT ATA koleksıalyq monetalaryn aınalymǵa shyǵarady, dep habarlaıdy Almaty-akshamy.kz BAQ.KZ-ke silteme jasap.
Qorqyt ata – qobyz atasy dep tanylady, jyrshy, mýzykant ári kompozıtor. Ańyz boıynsha, Qorqyt Syrdarıa dalasynan shyqqan jáne VIII-IX ǵasyrlarda ómir súrgen. 1980 jyly Qyzylorda qalasynda «Qorqyt ata» memorıaldyq kesheni salyndy. Mádenı mura retinde resmı túrde IýNESKO tizimine engizilip, 2018 jylǵy 28 qarashadan bastap memlekettiń qorǵaýyna alyndy.
QORQYT ATA monetasy kúmisten daıyndalǵan, synamasy – 925/1000. Massasy 24 gram, dıametri 37 mm, daıyndaý sapasy – proof, nomınaly 500 teńgelik, taralymy – 5 000 (bes myń) dana.
Koleksıalyq monetalar Qazaqstan Respýblıkasynyń búkil aýmaǵynda óziniń belgilengen qunyna saı tólemniń barlyq túri boıynsha qabyldanýǵa jatady. Elimizdiń barlyq bankinde bank shottaryna esepke alynýǵa jáne aýdarylýǵa, usaqtalýǵa jáne aıyrbastalýǵa tıis.
Koleksıalyq monetalar Qazaqstan teńge saraıynda daıyndaldy.
Eske sala keteıik, saıt paıdalanýshylary «Qazaqstan monetalary» mobıldi qosymshasyn júktep alýyna bolady. Onda qysqasha sıpattamasy bar serıalar boıynsha taqyryptyq bólimderge bólingen QUB-tyń barlyq monetasyna qatysty aqparat bar. Jekelegen monetalar boıynsha beınerolıkterge silteme, monetalardyń 3D beınesi, sondaı-aq tolyqtyrylǵan shynaıylyq elementteri ornalastyrylǵan.