Qytaı tarapymen kelisim jasaldy.
«Qorǵas» shekara mańy yntymaqtastyǵy ortalyǵy jaqyn arada ashylady. Jetisý oblysynyń áleýmettik-ekonomıkalyq damý máseleleri qaralǵan keńeste Premer-Mınıstr Álıhan Smaıylov daıyndyq jumystaryn jedeldetýdi tapsyrdy, dep habarlaıdy Almaty-akshamy.kz Úkimettiń resmı telegram kanalyna silteme jasap.
Premer-Mınıstr logıstıkany damytý oblystaǵy perspektıvaly baǵyttardyń biri ekenin atap ótti. Ol pandemıa bastalǵannan beri «Qorǵas» shekara mańy yntymaqtastyǵy halyqaralyq ortalyǵy toqtap turǵanyn, alaıda qazirgi ýaqytta Qytaı tarapymen ony ashý týraly kelisimge qol jetkizilgeni týraly aıtty.
«Qorǵas» jaqyn arada óz jumysyn bastaýy tıis. Endi daıyndyq jumystaryn jedeldetip, ortalyq qyzmetine tartylǵan barlyq qurylymdardyń ózara is-qımylyn qamtamasyz etý kerek», - dedi Úkimet basshysy.
Sonymen qatar, Álıhan Smaıylov josparlanyp otyrǵan ınvestısıalyq jobalardy ýaqtyly iske qosýdyń jáne óńirdi qoljetimdi baǵada áleýmettik mańyzy bar azyq-túlik taýarlarymen qamtamasyz etýdiń mańyzyn atap ótti.
Úkimet basshysy ýákiletti memlekettik organdarǵa birqatar naqty tapsyrma berdi: eldi mekenderde gaz taratý jelilerin, «Taldyqorǵan - Úsharal» magıstraldyq gaz qubyryn salý, Taldyqorǵandaǵy «Basqýat» qazandyǵyn jańartý jáne Tekeli qalasynyń turǵyndaryn sapaly aýyz sýmen qamtamasyz etý máselelerin pysyqtaý qajet.
Sonymen qatar, 6 aýylda sýmen jabdyqtaý júıelerin rekonstrýksıalaý men salýǵa, 15 apattyq jaǵdaıdaǵy kópirdi jóndeýge, Aqsý ortalyq aýdandyq aýrýhanasyn jóndeýge jáne seısmıkalyq jaǵynan kúsheıtýge qarajat bólý máselelerin qarastyrýǵa, sondaı-aq Kerbulaq aýdanynyń aýrýhanasyn jóndeýge jáne Taldyqorǵanda 500 adam qabyldaýǵa arnalǵan emhana salýǵa qarajat qarastyrý qajettigine nazar aýdardy.
Energetıka mınıstrligine Alakól jaǵalaýyndaǵy týrısik nysandardy úzdiksiz elektrmen jabdyqtaý úshin jeliler qurylysyn kezeń-kezeńmen qarjylandyrý máselesin qarastyrý, Ulttyq ekonomıka mınıstrligine ınjenerlik ınfraqurylym salý jáne Balqash kóliniń jaǵalaýyn abattandyrý jónindegi búdjettik baǵdarlamalardyń ákimshisin anyqtaý tapsyryldy.