Radıoelektronıka jáne baılanys áskerı-ınjenerlik ınstıtýty tórt jyldyq bilim berý baǵdarlamasyna tolyqtaı kóshti, dep habarlaıdy almaty-akshamy.kz.
Bul ózgeris oqý prosesin ońtaılandyrýǵa ári mamandardy daıarlaý sapasyn jaqsartýǵa baǵyttalǵan.
Instıtýt bastyǵy general-maıor Qaırat Daýtov jańa tórt jyldyq oqý baǵdarlamasy oqý materıalyn shoǵyrlandyrýǵa jáne daıyndyq qarqyndylyǵyn arttyrýǵa múmkindik beretinine toqtaldy.
– Tórt jyldyq oqý merzimine kóshý ınstıtýtqa osy ýaqyt ishinde bakalavr dárejesin alýdy kózdeıtin halyqaralyq bilim berý standarttaryna sáıkes kelýge múmkindik beredi. Mundaı sheshim joǵary bilikti mamandardy daıyndaý prosesin jedeldetip qana qoımaı, ony ıkemdi ári beıimdi etedi, – dep atap ótti ol.
Bıyl ınstıtýt eki jańa mamandyq engizip otyr. Sonyń biri «Jýrnalısıka jáne áskerı istegi qoǵammen baılanys» mamandyǵy Qarýly kúshterdiń qyzmetin saýatty ári tıimdi jarıalaı alatyn mamandardy daıarlaýdy kózdeıdi. Sıfrlyq tehnologıalar men aqparattyq soǵys dáýirinde áskerı jýrnalısiń róli barǵan saıyn mańyzdy bola bastady. Bul mamandyqtyń kýrsanttary sapaly kontent qurý, qoǵamdyq pikirdi qalyptastyrý jáne zamanaýı medıamen jumys isteý ádisterin úırenip shyǵady.
«Áskerı iste dırıjerlyq etý» mamandyǵyna oqýǵa túskender joǵary kásibı deńgeıde túrli is-sharalardy, sherýler men rásimderdi mýzykalyq súıemeldeýdi júzege asyratyn áskerı orkestrlerdi basqarýdy úırenedi. Bul mamandyq kýrsanttarǵa áskerı ortada shyǵarmashylyq jaǵynan da, ózin-ózi damytý jaǵynan da jańa múmkindikter ashady.
Túlekter tańdaǵan mamandyǵyna qaraı áskerı ınstıtýt pen seriktes joǵary oqý oryndary – Ál-Farabı atyndaǵy Qazaq ulttyq ýnıversıtetin nemese Qurmanǵazy atyndaǵy Qazaq ulttyq konservatorıasyn bitirgeni týraly eki dıplom alyp shyǵady.
Jańa mamandyqtarǵa oqýǵa túsýge nıet bildirgen talapkerler úshin 2024 jylǵy 20 maýsymnan 7 shildege deıin shyǵarmashylyq emtıhandarǵa tirkelý júrgiziledi. Ol 8-15 shilde aralyǵynda ótedi. Shyǵarmashylyq emtıhandar eń talantty ári yntaly úmitkerlerdi anyqtaıtyn mańyzdy irikteý kezeńi bolmaq.