Qorǵanys mınıstriniń tárbıe jáne ıdeologıalyq jumys jónindegi orynbasary general-maıor Shaıh-Hasan Jazyqbaevtyń basshylyǵymen ınspeksıalyq top qazaqstandyq bitimgerlik kontıngent ornalasqan Faýar bazasynda boldy.
Qorǵanys mınıstriniń orynbasary ulttyq kontıngent komandıri podpolkovnık Jiger Aıypovtyń baıandamasyn tyńdady. Alty aı ishinde qazaqstandyq bitimgerler shekara mańyndaǵy aýdandarda 168 patrúldeý júrgizgen. 18 ret BUU personalyn alyp júrgen, sondaı-aq 13 ret jarylmaǵan oq-dárilerdi zalalsyzdandyrýǵa qatysqan jáne 30 ret medısınalyq evakýasıa júrgizgen. Sonymen qatar jedel áreket etý toptary oqıǵa ornyna 102 ret barǵan, dep habarlaıdy aqshamnews.kz Qorǵanys ınıstrligine silteme jasap.
Sapar barysynda general-maıor Shaıh-Hasan Jazyqbaev mısıa qolbasshysynyń orynbasary brıgadalyq general Amıtabh Djamen pikir almasty. Qazaqstandyq kontıngenttiń kúndelikti ómirin uıymdastyrý men tártipti saqtaýda basqa bólimshelerge úlgi bolatynyn atap ótken ol qazaqstandyq bitimgerlerdiń kásibıligine joǵary baǵa berdi.
Bazanyń ornalasqan jerinde ınspeksıalyq top tehnıkanyń, qarý-jaraqtyń jaramdylyǵyn, qural-jabdyqtardyń jalpy jaı-kúıin egjeı-tegjeıli tekserdi. Mınıstrdiń orynbasary sonymen qatar turǵyn úı-jaılardy aralap, asqanada tamaqtanýdy uıymdastyrý jaǵdaıymen tanysty. Inspeksıa barysynda ol bitimgerlik bazasynyń aýmaǵynda ornalasqan oıyn alańdary, jabyq sport zaly, baseıni bar sport qalashyǵyn kórip shyqty. Onda qyzmetten bos ýaqytynda áskerı qyzmetshiler sportpen shuǵyldanady.
Esterińizge sala keteıik, «BUU kúshteriniń bólinýin baqylaý jónindegi» mısıasy qolbasshysynyń rezerv rotasy 139 áskerı qyzmetshiden turatyn qazaqstandyq bitimgerler BUU mandatyna sáıkes atysty toqtatý rejımin qoldaý jónindegi mindetterdi oryndaıdy.