Armıany zamanaýı jaraqtandyrý men jaýyngerlik ázirlikti qoldaýdyń asa mańyzdy faktor
Qorǵanys vedomstvosynyń basshysy general-polkovnık Rýslan Jaqsylyqov jumys saparymen Almatyǵa bardy. Sapardyń negizgi maqsaty – Qarýly kúshter men otandyq qorǵanys-ónerkásip kesheniniń birlesken qyzmetin jandandyrý, dep habarlaıdy Almaty-akshamy.kz.
Qorǵanys mınıstriniń jóndeý-qalpyna keltirý bazasynda áskerı tehnıka, qarý-jaraq pen basqa da áskerge qajetti ónimder shyǵaratyn jáne qyzmet kórsetýmen aınalysatyn kásiporyndardyń basshylarymen kezdesýi ótkizildi. Olardyń qatarynda «Kırov atyndaǵy mashına jasaý zaýyty» AQ, «SKBT «Granıt» JSHS, «Granıt-Tales elektronıks» JSHS, «Alataý «ASKB ǴTO» JSHS, «Almatyenergoservıs» JSHS jáne «Semeı Injınırıń» AQ bar. Kezdesýge sondaı-aq Indýstrıa jáne ınfraqurylymdyq damý mınıstrliginiń ókilderi de qatysty.
Qorǵanys vedomstvosynyń ókilderine qarý-jaraq pen áskerı tehnıkany jóndeý boıynsha sehtardyń óndiristik qýatynyń múmkindikteri kórsetildi, sondaı-aq Qarýly kúshterdiń qazirgi kezdegi otandyq qorǵanys-ónerkásiptik kesheniniń kúshimen iske asyrylýy múmkin áskerı maqsattaǵy ónimder men qyzmetterge degen qajettilikteri de atalyp ótildi. Óz kezeginde kásiporyn basshylary qazaq áskeriniń suranystaryn eskere otyryp, kórsetetin qyzmet salasyna sáıkes belgili bir jumys túrin oryndaý jóninde usynystaryn da aıtty.
General-polkovnık Rýslan Jaqsylyqov Qarýly kúshterdiń otandyq qorǵanys-ónerkásip keshenimen ózara is-qımyly el úshin strategıalyq mańyzy bar ekenin atap ótti. Birinshiden, bul armıany zamanaýı jaraqtandyrý men jaýyngerlik ázirlikti qoldaýdyń asa mańyzdy faktory. Ekinshiden, bul otandyq óndiristi qoldaý jáne damytý, jańa jumys oryndaryn ashý, demek, Qazaqstan ekonomıkasyna eleýli úles qosý dedi.
Kezdesý barysynda aıqyndalǵan birlesken is-áreketti ári qaraı damytý máselesi jaqyn arada múddeli mınıstrlikter men vedomstvolardyń qatysýymen pysyqtalatyn bolady.
Jumys sapary barysynda Qorǵanys mınıstri Jetigendegi avıabazaǵa baryp, áskerı ınfraqurylymdy jetildirý jáne nysandardy salý jumystarynyń barysymen tanysty. Onda shtattyq bólimshelerdiń kúshimen avıasıalyq tehnıkaǵa, ushqyshsyz basqarylatyn apparattarǵa, toraptar men agregattarǵa jóndeý jáne reglamenttik qyzmet kórsetý júrgiziletin sehtar kórsetildi. Mınıstr áskerı obektilerdiń dıversıaǵa qarsy qaýipsizdigine, qarý-jaraq pen oq-dárilerdi saqtaýdy uıymdastyrýǵa erekshe nazar aýdardy.
General-polkovnık Rýslan Jaqsylyqov sonymen qatar Áýe qorǵanysy kúshteriniń kishi mamandaryn daıarlaıtyn oqý-jattyǵý ortalyǵyna baryp, daıarlyqtyń uıymdastyrylýy men sarbazdardyń turmystyq jaǵdaılaryn da tekserdi. Onda merzimdi qyzmettegi jaýyngerler búginde ekonomıkanyń naqty sektorynda da suranysqa ıe áskerı mamandyqtar boıynsha alty aı boıy bilim alatynyn aıta ketken jón.