Qorǵanys vedomstvosynyń basshysy general-polkovnık Rýslan Jaqsylyqov Almaty jáne Qonaev garnızondarynda áskerı ınfraqurylym nysandary men medısınalyq-áleýmettik mekemelerde boldy.
Qorǵanys mınıstri Desanttyq-shabýyldaý áskerleriniń qolbasshysy general-maıor Almaz Jumakeevtiń áskerı nysandardyń jaı-kúıi men olardy jaılastyrý josparlary týraly baıandamasyn tyńdady. Ol DSHÁ qolbasshysy basqarmasynyń shtabyn kóshirýge josparlanǵan ǵımaratty aralap kórip, aýyr avtokólikter men saýytty mashınalar qozǵalysy úshin kópir salynatyn alańǵa bardy, dep habarlaıdy Almaty-akshamy.kz Qorǵanys mınıstrligine silteme jasap.
Qurlyq áskerleriniń áskerı ınstıtýtyna barǵan kezinde general-polkovnık Rýslan Jaqsylyqov «Álı» oqý ortalyǵy polıgonynyń, ǵımarattary men qurylystarynyń «Aıbyn» halyqaralyq áskerı-patrıottyq jastar jıynyn ótkizýge daıyndyǵyn tekserdi.
General-polkovnık Rýslan Jaqsylyqov Memlekettik áskerı-tarıhı mýzeıdiń Almaty fılıalynyń basshysy Alýa Baıqadamovamen kezdesti. Ol qazaqtyń qaharman uldary Saǵadat Nurmaǵambetov pen Rahymjan Qoshqarbaevtyń 100 jyldyǵyna arnalǵan is-sharalardy sapaly ótkizý qajettigine nazar aýdardy. Sondaı-aq mınıstr Uly Otan soǵysy batyrlary ósıet etken dástúrlerdi saqtaýdyń jáne Qarýly kúshter ardagerleriniń baǵa jetpes tájirıbesin jas urpaqqa jetkizýdiń mańyzdylyǵyn atap ótti.
Qonaev garnızonynda qorǵanys vedomstvosynyń basshysy 20030 áskerı bóliminiń oqý korpýsyn, kazarmasyn jáne sport qalashyǵyn tekserdi. 32363 áskerı bóliminde ol medısınalyq rota qurylysynyń barysymen jáne klýbtyń tehnıkalyq jabdyqtalýymen tanysty.
Sondaı-aq general-polkovnık Rýslan Jaqsylyqov «Baldáýren» balalardy ońaltý ortalyǵynda bolyp, áskerı qyzmetshiler men olardyń otbasy múshelerin emdeý, qalpyna keltirý jáne demalý úshin jasalǵan jaǵdaılarmen tanysty.
Sapar qorytyndysy boıynsha Qorǵanys mınıstri áskerı ınfraqurylymdy jetildirý, jaýyngerlik daıyndyqty arttyrý jáne áskerı qyzmetshiler úshin áleýmettik-turmystyq jaǵdaılardy jaqsartý jóninde birqatar tapsyrmalar berdi.