Mınıstr áskerı qalashyqtardyń ınfraqurylymyn tekserdi.
Qorǵanys vedomstvosynyń basshysy, general-polkovnık Rýslan Jaqsylyqov Almatyǵa jumys sapary aıasynda joǵary áskerı oqý oryndaryndaǵy oqý prosesin, áskerı bólimderdegi jaýyngerlik daıarlyqtyń barysyn, áskerı tehnıkany saqtaý men paıdalanýdyń jaı-kúıin, sondaı-aq áskerı qalashyqtardyń ınfraqurylymyn tekserdi, dep habarlaıdy Almaty-akshamy.kz.
Memleket basshysynyń «Ádiletti memleket. Birtutas ult. Berekeli qoǵam» Joldaýynda qoıylǵan tapsyrmalar aıasynda Qorǵanys mınıstrligine qarasty oqý oryndaryna erekshe kóńil bólindi.
Qurlyq áskerleriniń áskerı ınstıtýty men Radıoelektronıka jáne baılanys áskerı-ınjenerlik ınstıtýtynda oqý oryndarynyń bastyqtary Qorǵanys mınıstrine oqý-tárbıe prosesiniń barysy týraly baıandady. Oqý polıgondaryndaǵy bolashaq ofıserlerdi praktıkalyq daıarlaýǵa arnalǵan oqý-materıaldyq bazanyń jaǵdaıy da nazardan tys qalmady.
Qorǵanys mınıstriniń buǵan deıin bergen nusqaýlaryna sáıkes jańartylyp, jetildirilgen oqý korpýstary, kafedralar, kazarmalyq úı-jaılar, asqanalar men sport keshenderi kórsetildi.
Qurlyq áskerleri áskerı ınstıtýtynyń oqý-jattyǵý ortalyǵynda Qorǵanys mınıstri bólim komandırleriniń jıyndaryn uıymdastyrýdy qadaǵalap, olardyń jedel jáne taktıkalyq daıyndyq boıynsha bilimderin tekserýge qatysty.
Desanttyq-shabýyldaý áskerleriniń bólimderinde general-polkovnık Rýslan Jaqsylyqov jeke quramnyń jaýyngerlik oqý prosesimen, atap aıtqanda, arnaıy trenajerlarmen jabdyqtalǵan áýe-desanttyq daıarlyq oqý keshenindegi sabaqtardyń barysymen tanysty.
Áskerı tehnıkany tekserý barysynda qorǵanys vedomstvosynyń basshysy ony uqypty ustaýǵa, saqtaý men qyzmet kórsetý úshin qajetti jaǵdaılar jasaýǵa basty nazar aýdardy.
«Áskerı tehnıka kez kelgen ýaqytta jaýyngerlik tapsyrmlardy oryndaýǵa daıyn bolýy kerek. Bul áskerlerdiń jaýyngerlik daıyndyǵy men jaýyngerlik qabiletiniń negizgi quramdas bóligi», – dep atap ótti komandırlermen áńgime barysynda general-polkovnık Rýslan Jaqsylyqov.
Qorǵanys mınıstriniń Almaty garnızonyndaǵy jumysynyń jeke baǵyty Qarýly kúshter ardagerlerimen kezdesý bolǵanyn atap ótken jón. Qorǵanys vedomstvosynyń basshysy ardagerlerge áskerı bólimshelerdiń jaýyngerlik ázirliginiń jaı-kúıi, Qarýly Kúshterdi qarý-jaraq pen áskerı tehnıkanyń zamanaýı úlgilerimen jaraqtandyrý, áskerı ınfraqurylymdy jetildirý boıynsha qabyldanyp jatqan sharalar týraly keńinen áńgimelep berdi.
Sonymen birge olardyń qurmetti demalysqa shyqqannan keıingi beıimdelýi, ardagerler uıymdarynyń áleýetin áskerı-patrıottyq tárbıege tartý máseleleri de qaraldy.
Óz kezeginde Qarýly Kúshterdiń ardagerleri RQB Almaty fılıalynyń basshylary elimizdiń áskerı qaýipsizdigine tónetin zamanaýı qaýip-qaterler aıasynda Qazaqstan áskerin odan ári damytý týraly óz usynystaryn ortaǵa saldy.