Bul týraly Ekologıa jáne tabıǵı resýrstar mınıstri Erlan Nysanbaev Májiliste ótken dóńgelek ústel otyrysynda aıtty, dep habarlaıdy almaty-akshamy.kz.
"Ekologıa mınıstrligi Ónerkásip jáne qurylys mınıstrligimen birlesip "E-qurylys" aqparattyq júıesin kúsheıtý aıasynda qaldyqtardy túzýshilerdiń (qurylys kompanıalarynyń) qurylys qaldyqtarynyń qozǵalysyn baqylaý tetigin pysyqtap jatyr. Qaldyqtardyń paıda bolý kólemi jáne arnaıy kásiporyndarmen qatty turmystyq qaldyqtardy shyǵarý boıynsha sharttardyń bolýy týraly málimetterdi osy júıede kórsetý usynylady. Búginde normatıvtik tehnıkalyq qujattarǵa ózgerister engizililip jatyr. Memleket basshysynyń tapsyrmasyna sáıkes ákimdiktermen birlesip qurylys qaldyqtaryn jınaý alańdaryn uıymdastyrý jáne qaıta óńdeý boıynsha qýattardy ulǵaıtý jumystary júrgizilýde", - dedi vedomstvo basshysy.
Sózinshe, 19 óńirde bul jumys jolǵa qoıyldy jáne Abaı, Aqtóbe, Jambyl, Jetisý, Mańǵystaý, Túrkistan, Ulytaý oblystarynda jol kartalary ázirlendi.
Erlan Nysanbaev azamattar men bıznes sýbektileriniń sanasyn arttyrý maqsatynda belgilengen oryndardan tys jerlerde qoqys shyǵarǵany úshin aıyppul mólsherin ulǵaıtý máselesi qarastyrylyp jatqanyn aıtty.
"Ekologıa mınıstrligi belgilengen oryndardan tys jerde qoqys shyǵarǵany úshin aıyppuldardy ulǵaıtýdy kózdeıtin Ákimshilik quqyq buzýshylyq týraly kodekske túzetýler ázirledi. Mysaly, jeke tulǵalar úshin 50 AEK-ten 200 AEK-ke deıin, al shaǵyn kásipkerlik sýbektileri nemese komersıalyq emes uıymdar úshin 100 AEK-ten 750 AEK-ke deıin, orta kásipkerlik sýbektileri úshin 100 AEK-ten 1000 AEK-ke deıin, iri kásipkerlik sýbektileri úshin 100 AEK-ten 2000 AEK-ke deıin. ÁQBtK-degi osy túzetýler "Qazaqstan Respýblıkasynyń keıbir zańnamalyq aktilerine Astanany jáne Respýblıkalyq mańyzy bar qalalardy damytý máseleleri boıynsha ózgerister men tolyqtyrýlar engizý týraly" QR Zańynyń jobasy sheńberinde kózdelgen, ol búginde qoǵamdyq tyńdaýdan ótti jáne kórsetilgen túzetýler boıynsha retteýshilik áserge taldaý júrgiziledi", - dep atap ótti mınıstr.
Vedomstvo basshysynyń dereginshe, byltyr qaldyqtardy kómý obektileri boıynsha 29 tekserý júrgizilip, shamamen 10 mln teńge mólsherinde aıyppul salynǵan.