«Rezeńkeden jasalǵan bolar» - Almaty haıýanattar baǵyna kelýshiler ondaǵy qoltyraýynnyń ras - ótirigine kúmándanyp jatady.
Osyǵan baılanysty Almaty zoobaǵynyń áleýmettik jelisinde qoltyraýynnyń shynaıy ekenin kórsetetin vıdeosy jarıalandy, dep habarlaıdy Almaty-akshamy.kz
Onda az ýaqyt qozǵalyssyz turǵan qoltyraýynnyń sálden keıin, qozǵalyp bara jatqanyn kórýge bolady. Shyn máninde, bul jyrtqysh janýarǵa tán qasıet. Sondyqtan oǵan qatty jaqyndaý ómirińiz úshin qaýipti ekenin eske salǵan artyq bolmas.
«Shynynda da, ol birneshe saǵat boıy qımyldamaı, qozǵalyssyz jatady. Biz eń úlken baýyrymen jorǵalaýshy – Kýbalyq qoltyraýyn týraly aıtyp otyrmyz. Oǵan ózine tán erekshe Fıdel degen at berildi. Ol 1986 jyly týǵan, Fıdel bizge 2001 jyly Latvıa eliniń Rıga qalasyndaǵy haıýanattar baǵynan ákelindi. Qazir ol 37 jasta jáne uzyndyǵy shamamen 2,5 metrge jetedi. Fıdeldiń rasıonynda sıyr eti, taýyq eti jáne balyq bar. Fıdel aptasyna bir ret, keıde eki aptada bir ret qorektenedi. Sebebi, biz tamaq únemdeıtindikten emes, ol apta boıy qozǵalyssyz jatyp, jegenin qorytady. Tabıǵatta qoltyraýyndar otyryqshy ómir saltyn ustanady jáne kúndelikti qorektenbeıdi. Mundaı sátterde ony bizdiń kelýshiler sýda nemese jaǵalaýda toıymdy túski astan keıin jıi kóredi. Qoltyraýyndar tamaqty kúndelikti jep, shamadan tys qorektenetin bolsa ol semirip, júrek, qan tamyrlary men asqazan-ishek joldarynyń aýrýlary paıda bola bastaıdy
Qoltyraýyndy uzaq baqylap, oǵan qarap tursań anda-sanda kózin ashyp-jumyp, aýzyn qatty ashyp, jaýyp turatynyn kórýge bolady.
Qoltyraýyndardyń asqazanyna sýdyń túsýine jol bermeý úshin óńeshterin tańdaı perdesi jaýyp turady. Sonyń arqasynda sýda júzip júrip janýarlarǵa shabýyl jasaǵanda asqazanyna sý túspeıdi.
Almaty haıýanattar baǵynda qoltyraýyndardyń úsh túri bar: kýbalyq, sıamdyq jáne Kaıman qoltyraýyny. Biraz kúnde olar jyly ári jaıly qysqy turaqtaryna ornalastyrylady.
Ázirge, kúzdiń jaımashýaq kúnderinde daladaǵy qorshaýlarda turady», - degen sıpattama berilgen vıdeonyń tómengi jaǵynda.
Qoltyraýynǵa qalaı tamaq beriletinin ár sársenbi kúni saǵat 14.00-den 15.00-ge deıin baryp kórýge bolady.