Tuman jáne kóktaıǵaq bolady
"Qazgıdromet" RMK derekterine sáıkes, elimizdiń keıbir oblystarynda 30 qarashada qolaısyz aýa raıyna baılanysty eskertý jarıalandy. Sınoptıkter qatty jaýyn-shashyn, tuman jáne kóktaıǵaq bolatynyn boljaıdy, dep habarlaıdy Almaty-akshamy.kz.
Kúndiz Qyzylorda oblysynyń ortalyǵynda soltústik shyǵystan batysqa oıysa 15-20 m/s jyldamdyqpen jel soǵady.
Túnde Shyǵys Qazaqstan oblysynyń soltústik shyǵysynda -40°S qatty aıaz bolady.
Túrkistan oblysynyń taýlarynda qatty jaýyn-shashyn bolady (qar aralas jańbyr). Oblystyń ońtústiginde, batysynda, taýly aýmaqtary men taý bókterinde tuman túsip, kóktaıǵaq bolady. Taý asýlarynda ońtústik batystan qatty jel soǵady, ekpini - 15-20 m/s.
Shymkent qalasynda tuman túsip, kóktaıǵaq bolatyny boljanady.
Túrkistanda da tuman, kóktaıǵaq bolady.
Jetisý oblysynyń soltústiginde, taýly aýdandarynda tuman túsedi. Óńirdiń soltústiginde, shyǵysynda soltústik shyǵystan soqqan jeldiń ekpini 15-20 m/s, keı tusta 23-28 m/s quraıdy. Alakól aýmaǵynda ońtústik shyǵystan soqqan jeldiń ekpini 30 m/s jáne odan da joǵaryǵa jetedi dep boljanady.
Sınoptıkter respýblıkamyzdyń kóp bóligi áli de sýyq soltústik antısıklonnyń yqpalynda ekenin, osyǵan baılanysty aıazdy aýa raıy saqtalatynyn eskertedi.