Slovenıa - Qazaqstan oıyny 2-1 esibimen aıaqtaldy, dep habarlaıdy Almaty-akshamy.kz
Slovenıanyń «Stojıse» stadıonynda 2024 jylǵy Eýropa chempıonatynyń irikteý kezeńi aıasynda Qazaqstan men Slovenıa quramalary kezdesti. Bul eki qurama úshin de toptyq kezeńdegi eń sońǵy, ári sheshýshi oıyn edi. Eýro-2024 týrnırine toptan tikeleı shyǵý úshin Qazaqstanǵa tek jeńis qajet bolsa, al Slovenıaǵa teń nátıje de jetkilikti bolatyn. Sondyqtan da eki komanda jeńis úshin baryn saldy. Aıta keter jaıt, el quramasynyń beldi oıynshylary Bahtıer Zaınýtdınov, Asqat Taǵybergen, Baǵdat Qaıyrovtar jaraqattaryna baılanysty oıynǵa qatysa almady. Kezdesýdegi esep 40-mınýtta Qazaqstan qaqpasyna belgilengen penaltıden ashyldy. Oıyn tóreshisi Marsınák Ian Vorogovskıdiń aıyp alańynda Stoıanovıchke jasaǵan áreketin VAR júıesinen qaıtalap kórip, tártip buzý dep baǵalady. Penaltı tepken Benámın Sheshko múlt ketpedi. Komandalar taım aralyq úziliske 1-0 esebimen tarqasty.
Ekinshi taım Qazaqstan jankúıerleri úshin qýanyshpen bastaldy. Úzilisten keıin jınaqy oınaı bilgen el quramasy machtyń 48-mınýtynda esepti teńestirdi. Ramazan Orazov Samorodovtyń pasynan keıin Slovenıa qaqpasyna gol soqty. Odan ári oıyn qarqyny qyza tústi. Oıynnyń 86-mınýtynda qarymta shabýyldy sátti paıdalanyp ketken Slovenıa quramasy esepte alǵa shyqty. Gol soqqan – Benámın Verbıch. Oıyn 2-1 esebimen Slovenıanyń jeńisimen aıaqtaldy. Bul jeńiliske qaramastan Qazaqstan quramasynyń Eýropa chempıonatyna Ulttar lıgasy arqyly shyǵýǵa múmkindigi bar.