Qujat 24 jeltoqsanǵa deıin qoǵamdyq talqylaýda bolady.
Sıfrlyq damý mınıstrligi qazaqstandyqtarǵa eGov mobile qosymshasy arqyly qoǵamdyq oryndarda tegin ınternetke qosylýǵa múmkindik bermek, dep habarlaıdy aqshamnews.kz
Qazir azamattar qoǵamdyq oryndarda SMS nemese telefon qońyraýy arqyly jiberilgen paról arqyly ǵana tegin ınternetke qosyla alady.
Mınıstrliktiń málimetinshe, qosylymnyń eki ádisi de aqyly bolǵandyqtan, bul kásipkerlerge úlken shyǵyn ákeledi. Mınıstrlik keıbir bıznes ıeleri shyǵyndardy boldyrmaý maqsatynda qaýipsizdik úshin engizilgen aýtentıfıkasıa erejelerin aınalyp ótetinin aıtady.
Endi sıfrlyq damý mınıstrligi tegin Wi-Fi-ǵa arnalǵan qupıa sózderdi eGov mobile qosymshasy jáne SMS habarlamalary arqyly jiberýdi usynady. Mınıstrlik qońyraýlar arqyly aýtentıfıkasıadan bas tartpaq.
«Bul azamattar úshin qolaıly, sáıkestendirý prosesin jyldamdatady jáne qaýipsizdiktiń qosymsha deńgeıin qamtamasyz etedi. eGov-pen ıntegrasıa aýtentıfıkasıa úshin memlekettik derekterdi paıdalanýǵa múmkindik beredi, bul alaıaqtyq qaýpin azaıtyp, paıdalanýshylarǵa qoljetimdilikti jeńildetedi», – delingen mınıstrlik habarlamasynda.
Sondaı-aq buıryq jobasynda júıege bank kartasynyń nómiri men elektrondyq poshta arqyly da kirýge bolatyny aıtylǵan.