Májilis Memleket basshysynyń tapsyrmasy boıynsha ázirlengen "Quqyqbuzýshylyq profılaktıkasy týraly" jańa zańdy ekinshi oqylymda qabyldady.
Zańda quqyqbuzýshylyq profılaktıkasy júıesi keńeıtilip, profılaktıka sýbektileriniń sany 13-ten 26-ǵa deıin artady. Oǵan otbasyn qoldaý ortalyqtary, mobıldi toptar, qamqorshylyq organdary, BAQ, jastar isi jónindegi ortalyqtar, ýákiletti organdar jáne kásipkerler kiredi.
Sonymen qatar profılaktıka modeliniń ózi qaıta qaralady. Endi oǵan jalpy, jeke jáne arnaıy sharalar engiziledi.
Ákimshilik quqyqbuzýshylyq týraly kodekske engizilgen túzetýlerde qoǵamdyq oryndarda betti jaýyp turatyn, tanýǵa kedergi keltiretin kıim (nıqab) kıgeni úshin ákimshilik jaza qarastyrylǵan. Quqyqbuzýshylyq úshin birinshi ret eskertý jasalady, qaıtalanǵan jaǵdaıda 10 AEK kóleminde aıyppul salynady.
Zańǵa qaıshy kontentti jarıalaǵandar men taratqandarǵa, sondaı-aq memlekettik organdardyń buzýshylyqtardyń sebebin joıý týraly nusqaýlaryn qasaqana oryndamaǵandarǵa qatysty jaýapkershilik engiziledi.
Tabıǵı jáne tehnogendik tótenshe jaǵdaılardyń aldyn alý boıynsha azamattyq qorǵanys sharalaryn oryndamaǵany úshin memlekettik laýazymdy tulǵalar men jergilikti bılik organdaryna jańa jaýapkershilik túrlerin kózdeıtin túzetýler engizildi. Endi Tótenshe jaǵdaılar mınıstrligi mundaı adamdardy jaýapkershilikke tartýǵa quqyly.
Qoǵamdyq oryndarda nıqab kıgeni úshin jaza qoldanylady
- 14:06, 03 jeltoqsan 2025
Sýret JI