Jelíde 50 jyl otasqan jūptyń "Altyn toıynan" vıdeo tarady. Keıín oqyrmandar olardyń ómírí men berík mahabbatynyń qūpıyasyna qyzyǵa bastady. Aqshamnews.kz tílshísí Sharabaevtar otbasymen sūhbattasty.
Áleumettík jelíde basty keıípkerge aınalǵan Ahmet aǵa men Raıhan apa - Kerbūlaq audany, Jańalyq auylynyń tumalary. Olar ekí ūl, bír qyz ósíríp, olardan alty nemere súıíp otyr.
Būdan 50 jyl būryn 21 qarashada shańyraq kótergen jūp qalaı tanysqanyn aıtyp berdí.
"Bír kórgennen ǵashyq boldym"
"Raıhan ol kezde dúkende satushy bolyp ísteıtín. Bír kórgennen ǵashyq boldym. Bír jyl júríp, keıín otbasyn qūrdyq. Jas otbasyǵa dep memleket 1975 jyly úı beríp, "jaqsy jūmys ísteńder" dep sením artqan. Bíraq úıdíń íshínde múlík kóp bolǵan joq: bír oryndyq, ekí kese, ekí tarelka, bír tósek qana boldy. Sonyń ózíne shúkír dep, otbasymyzdy qūryp, sol úıde tūra bastadyq, – deıdí Ahmet ata.
"Men júrgízushí bolyp ístedím. Tańnan keshke deıín reıske ketemín, Rákeń (Raıhan - esk.) dúkende ísteıdí. Keshke bírímíz-bírímízdí jūmystan kútíp alamyz. Sharshap kelemíz de, "qıyn boldy" dep oılanbaımyz da, tamaǵymyzdy íshíp, ūıyqtap qalamyz. Ol kezde dúken keshkí 9-ǵa deıín ísteıdí. Solaı júríp, ómírímíz ótíp jatty", – deıdí Ahmet atamyz.
Alǵashqy balalary dúnıege kelgennen keıín Raıhan apa buhgalterlík oquǵa túsíp, mamandyǵyn da auystyrǵan.
"Bírínshí balamyz ómírge keldí. Keıín Rákeń buhgalterlíkke oquǵa túsíp, Talǵarǵa baryp, buhgalter mamandyǵyn alyp shyqty. Odan keıín selsovette (auyldyq keńeste - esk.) hatshy bolyp jūmys ístedí", – deıdí ol.
"Būryn shóp shabatyn uaqytta bír aı boıy tynymsyz eńbek etetínbíz. Ómírdíń ózí sondaı bolatyn. Qıyn, auyr jūmystan keletínímízdí bíletín Rákeń aldyn ala laǵman ázírlep qoyady. Bíz shóptí ákelemíz, ol úıde laǵmanyn daıyndap, monsha jaǵyp qoyady. Jūmystan kelgende aldymen monshaǵa túsíp, sharshaǵanymyzdy basyp alamyz. Bárí tap-taza, daıyn tūrady. Sodan keıín ǵana otyryp tamaq íshemíz de, qaıtadan jūmysqa kírísemíz", – deıdí Ahmet aǵa.
50 jyl men "Altyn toı"
Áleumettík jelíde vıdeosy taraǵan "Altyn toı" turaly sūraǵanymyzda, būl ıdeyany Raıhan apa ūsynǵanyn bíldík."Basynda bíz altyn toıdy úıde ǵana, azdaǵan adammen atap ótemíz dep júrgenbíz. Bíraq Rákeń bala-shaǵamen aqyldasyp, "būndaı mereke árkímníń basyna kele bermeıdí, bír dūrys qylyp toılap tastaıyq" dedí. Keıín balalarymyz da qoldap, bárí jabylyp, bír auyzdan maqūldady. Tuǵan-tuys, qūda-qūdaǵı, joldastar, kórshí-qolań, ómír boıy bízben bírge bolǵan jandardyń bárí kelsín, bízdíń ómírímízdíń qalaı ótkenín, qandaı otbasy bolǵanymyzdy óz kózderímen kórsín dep oıladyq. Sol toı balalarymyzdyń, búkíl áulettíń bízge jasaǵan úlken syıy boldy", - deıdí olar.
Al aq kóılek toıǵa bírneshe uaqyt qalǵanda "Baısat" bazarynan tabylǵan.
"Kóılektí Baısat bazaryna baryp, jalǵa aldyq", – deıdí erlí-zaıyptynyń qyzy.
Būǵan qosa, jūptyń balalary ata-anasyn "bal aıyn" Dubaıda qarsy alsyn degen nıetpen joldama syılaǵan.
50 jyl tútín tútetíp, bír shańyraq astynda tatu-táttí ómír súrudíń basty syry qandaı? Būl sūraqqa Ahmet ata jauap berdí:
"50 jyl bírge tūru úshín eń mańyzdysy – tózím men shydamdylyq. Bíríńdí-bíríń tyńdaı bílu kerek. Bírí qatty sóılep tūrsa, ekínshísí úndemeı qalǵan dūrys. Qatty renjískende dalaǵa shyǵyp, óz-ózíńdí basyp kelesíń. Ashu basylǵannan keıín Rákeń mení shaıǵa shaqyrady. Shaı íshíp otyryp, sóılesemíz, bíraq sol ūrysqan áńgímení qaıta qozǵamaımyz. Sonyń ózí úlken tárbıe eken. Solaı-solaı 50 jyl óte shyǵypty".
Sharabaevtar áuletíníń áńgímesí - berík mahabbattyń, eńbektíń, sabyr men syılastyqtyń, "ashudy shaımen basatyn" qazaqy danalyqtyń úlgísí.