Qazaqstanda Qoǵamdyq keńester úılestirý ortalyǵynyń kezekti otyrysy ótti. Jıynǵa respýblıkalyq jáne jergilikti deńgeıdegi 56 qoǵamdyq keńestiń tóraǵalary qatysty. Bul týraly Aqshamnews.kz habarlaıdy.
Qazaqstan Respýblıkasy Mádenıet jáne aqparat mınıstrligi janynan qurylǵan Úılestirý ortalyǵy – elimizdiń túkpir-túkpirindegi qoǵamdyq keńes músheleriniń ózara tájirıbe almasyp, ortaq máseleler boıynsha sheshimder usynatyn alańy.
Ulttyq quryltaı júktegen mindetter – qoǵamdyq baqylaýda
Kezdesýdiń basty taqyryby – Memleket basshysy Qasym-Jomart Toqaev Ulttyq quryltaıdyń IV otyrysynda belgilegen strategıalyq baǵyttardy iske asyrýda qoǵamdyq keńesterdiń rólin kúsheıtý boldy.
Spıkerler óńirlerdegi tabysty tájirıbelermen bólisip, ardagerler men aqsaqaldar keńesin memlekettik baǵdarlamalarǵa tartý qajettigin de atap ótti.
Ekologıa – basty nazarda
Ulttyq quryltaıda kóterilgen mańyzdy taqyryptardyń biri – ekologıa máselesi. Otyrys barysynda «Taza Qazaqstan» respýblıkalyq ekologıalyq aksıasyn uıymdastyrý joldary keńinen talqylandy. Qoǵamdyq keńesterdiń bul baǵyttaǵy jumysynyń tıimdiligin arttyrý qajettigi kún tártibine shyqty.
Qoǵamdyq keńester qyzmetine baǵalaý júıesi engiziledi
Jıyn aıasynda qatysýshylarǵa qoǵamdyq keńes músheleriniń qyzmetin baǵalaýdyń úlgilik ádistemesi usynyldy. Bul júıe:
- Qoǵamdyq ınstıtýttardyń ashyqtyǵy men eseptiligin arttyrady;
- Keńesterge degen qoǵam senimin kúsheıtedi;
- Bastamalar tıimdiligin júıeli túrde baǵalaýǵa múmkindik beredi.
Jańa serpin men naqty qadamdar
Otyrys qorytyndysy boıynsha kelesi baǵyttarda usynystar ázirlendi:
- Ulttyq quryltaıda qoıylǵan mindetterdi oryndaý;
- Qoǵamdyq keńesterdiń memlekettik bastamalarǵa qatysý aıasyn keńeıtý;
- Keńesterdiń ınstıtýsıonaldyq damýyn jalǵastyrý.
Qoǵamdyq keńester – halyq pen bılik arasyndaǵy dıalogty qamtamasyz etetin mańyzdy kópir. Olardyń belsendiligi eldiń turaqty damýy men ádiletti qoǵam qalyptastyrýda sheshýshi ról atqarady.