Kúzetshiler ony meshit aýlasynan shyǵarýǵa májbúr bolǵan
QMDB meshit ádebin saqtamaǵan qyzǵa qatysty túsinikteme berdi, dep habarlaıdy Almaty-akshamy.kz QMDB janyndaǵy Respýblıkalyq Bas meshittiń baspasóz qyzmetine silteme jasap.
21 tamyzda saǵat 18:48-de Qazaqstan musylmandary dinı basqarmasy janyndaǵy Respýblıkalyq Bas meshitke kelgen qyz qulshylyq úıiniń ishki tártibi men ádebin óreskel buzyp, ımam jumysyna, namaz oqýshylardyń qulshylyǵyna kedergi keltirdi.
Din qyzmetkerleri oǵan meshit ádebi týraly túsindirdi. Alaıda ımam keńesine baǵynbaǵan ol «men Máhdımin, ony osy járde dáleldeýim kerek» dep qarsylyq tanytqan. Meshit qyzmetkerleri er azamattar namaz oqıtyn orynǵa áıelderdiń kelýine bolmaıtynyn jetkizip, ony syrtqa shyǵarýǵa májbúr bolady. Ol meshit aýlasynda ersi áreketter jasap, kúzetshilerdiń eskertýine qulaq aspaǵan. Kúzetshiler ony meshit aýlasynan shyǵarýǵa májbúr bolǵan.
«Meshitte ádep saqtamaǵan qyzdyń jeke tulǵasyna qatysty málimet joq. Osy rette meshitke kelýshi azamattardy qulshylyq úıinde qarapaıym adamgershilik ádepterdi saqtaýǵa shaqyramyz» dep jazdy QMDB janyndaǵy Respýblıkalyq Bas meshittiń baspasóz qyzmeti.