Qazaqstan Respýblıkasynyń Qarjylyq monıtorıń agenttigi Qazaqstan Respýblıkasynyń azamaty 1995 jylǵy 18 qyrkúıekte týǵan, Qamza Qaısar Baqytjanulyna halyqaralyq izdeý jarıalady, - dep habarlaıdy Aqshamnews.kz.
Sotpen oǵan qatysty «qamaýda ustaý» túrindegi bultartpaý sharasy sanksıalanǵan.
Ol zańsyz oıyn bıznesine járdemdesti degen kúdikke ilinýde.
Kúdikti 5 jyl boıy «Instagram» áleýmettik jelisinde, «qais_arr» ataýymen (2,4 mln jazylýshy) belsendi blogerlik qyzmet júrgizip, sondaı-aq «Telegram»-daǵy «Qora enterteınment» jabyq arnasyn (368 myń jazylýshy) basqarǵan.
Kúdikti áleýmettik jelilerdegi jeke akkaýnttaryn paıdalana otyryp, Qazaqstan Respýblıkasynyń azamattary úshin «Pinco» saıtynda tirkelýge jáne qumar oıyndarǵa qatysýǵa baǵyttalǵan tikeleı siltemelerdi, grafıkalyq elementterdi jáne úndeýlerdi qamtıtyn beınematerıaldar men jarıalanymdardy júıeli túrde ornalastyrǵan. Sonymen qatar beınerolıkterdiń astynda paıdalanýshylarǵa bonýs beretin jeke promokodyn kórsetken.
Osylaısha, Qamza Q.B. azamattardy qumar oıyndarǵa tartýǵa baǵyttalǵan onlaın-platformany jarnamalap, oıyn platformasynan syıaqylar, bonýstar nemese paıyzdyq aýdarymdar túrinde tabys alyp otyrǵan.
Zańsyz jolmen alynǵan kiristerdi jasyrý maqsatynda kúdikti krıptoámıandy paıdalanǵan. Oǵan «Pinco» ınternet-kazınosynyń uıymdastyrýshylarynan tólemder túsip otyrǵan.
Sot sanksıasymen 182 736,741 USDT kólemindegi krıptoaktıvterge tyıym salyndy.
Qarjylyq monıtorıń agenttigi eger izdeýde júrgen tulǵanyń ornalasqan jeri týraly qandaı da bir aqparat belgili bolsa, kelesi baılanys nómirleri arqyly habarlaýdy suraıdy:
+7 7172 70 84 78 — kezekshi bólim.
Call-center: 1458