2025 jyly Skills Enbek kásiptik oqytý platformasynda 570 myń azamat, onyń ishinde 53,5 myń jumyssyz onlaın-kýrstardy sátti aıaqtap, sertıfıkattarǵa ıe boldy, - dep habarlaıdy Aqshamnews.kz.
Platformada barlyǵy 1,5 mln-nan astam paıdalanýshy tirkelgen, olardyń 925,7 myńy – 2025 jyly tirkeldi. Al Skills Enbek iske qosylǵannan beri jalpy shamamen 1,2 mln adam bilim aldy.
Oqytylǵan 56,6 myń jumyssyz azamattyń shamamen 16,9 myńy – 16-35 jas aralyǵyndaǵy jastar. Olar negizinen Túrkistan (3,5 myń adam), Qostanaı (2,8 myń), Qyzylorda (2,5 myń) oblystarynan, sondaı-aq Almaty qalasynan (2,3 myń) jáne Almaty oblysynan (2,2 myń) shyqqan.
Sonymen qatar 2025 jyly Skills Enbek platformasynda sertıfıkat alǵan jumyssyzdardyń 56%-dan astamyn áıelder quraıdy (32 myń adam). Áıelderdiń eń joǵary úlesi Túrkistan (3,5 myń), Qostanaı (2,8 myń), Qyzylorda (2,6 myń) oblystarynda, sondaı-aq Almaty qalasy men Qaraǵandy oblysynda (árqaısysynda 2,3 myń adam) tirkelgen.
2025 jyly bilim alǵandardyń shamamen 26 myńy – aýyldyq jer turǵyndary. Olardyń basym bóligi Túrkistan (3,2 myń), Qyzylorda (2,9 myń) jáne Almaty (2,6 myń) oblystarynan.
Platforma iske qosylǵan sátten bastap avtorlar túrli baǵyttar boıynsha 1 000-nan astam kýrs jarıalady, olardyń 382-si – tegin. Sondaı-aq Courstore, Fluent Education jáne Iandeks Qazaqstan seriktesteriniń kýrstary usynylyp, bilim alýshylarǵa osy bilim berý alańdarynda oqýdy jalǵastyrý múmkindigi qarastyrylǵan.
Kýrstardyń uzaqtyǵy 1 saǵattan 72 saǵatqa deıin.
2025 jyly eń tanymal kýrstar qatarynda: «IT jáne telekomýnıkasıalar», «Aspaz-kondıter», «Seniń mansaptyq bastamań: «Elektrondyq eńbek bırjasyn» qalaı paıdalanýǵa bolady» qalaı paıdalanýǵa bolady», «Personaldy basqarý», «Pishý jáne tigý» boldy.
Skills Enbek platformasynda áleýmettik qyzmet kórsetý jáne basqa da baǵyttar boıynsha tegin kýrstardyń sany turaqty túrde artyp keledi.
Buǵan deıin habarlanǵandaı, platforma el halqynyń bilim deńgeıi men kásibı biliktiligin arttyrýǵa, mansaptyq damýdy yntalandyrýǵa jáne «ómir boıy bilim alý» tujyrymdamasyn ilgeriletýge baǵyttalǵan. Ol qyzmetter naryǵynyń marketpleıs qaǵıdaty boıynsha onlaın-kýrstarǵa qoljetimdilik usynatyn halyqaralyq bilim berý platformalarynyń úlgisimen qurylǵan.
Oqýǵa tikeleı https://skills.enbek.kz/ siltemesi arqyly nemese Elektrondyq eńbek bırjasyndaǵy «Onlaın oqytý» bólimi (budan ári – Enbek.kz) arqyly qol jetkizýge bolady.
Skills Enbek platformasynda bilim alýshy oqý qarqynyn, tilin, materıaldy usyný tásilin óz betinshe tańdaı alady jáne oqý barysyndaǵy ilgerileýin qadaǵalaıdy.
Bilim alýshylar úshin artyqshylyqtar: kýrstardy keńeıtilgen izdeý múmkindigi, sabaqtardyń túsinikti qurylymy, oqý prosesin baqylaý jáne kýrs avtorlarymen jedel baılanys. Paıdalanýshylar úshin qyzyqty suraqtarǵa jyldam jaýap beretin jasandy ıntellektke negizdelgen chat-bot qoljetimdi.
Oqýdy aıaqtaý úshin bilim alýshy 70% shekti deńgeıden tómen emes nátıjemen testileýden ótýi tıis. Kýrsty sátti aıaqtaǵan jaǵdaıda daǵdyny meńgergeni týraly sertıfıkat beriledi. Oqýdy aıaqtaýdyń mindetti sharty – kýrsqa baǵa berý. Sertıfıkatty júkteý kezinde alynǵan daǵdylarǵa sáıkes bos jumys oryndaryna Enbek.kz saıtyna ótý múmkindigi bar usynystar qosa beriledi.
Alynǵan sertıfıkat Enbek.kz portalynda tirkelý kezinde jasalǵan túıindemede avtomatty túrde kórsetiledi. Qyzmetkerlerdi izdeý barysynda áleýetti jumys berýshiler platformada sátti aıaqtalǵan kýrstar boıynsha alynǵan sertıfıkattardy kóre alady.
Skills Enbek platformasyna onlaın-kýrstardy ornalastyrý avtorlar men ázirleýshiler úshin tegin. Kýrstar qazaq, orys jáne aǵylshyn tilderinde usynyla alady jáne aqparatty usynýdyń ártúrli formattaryn qamtýy tıis: mátin, prezentasıalar, beıne jáne aýdıomaterıaldar, ınfografıka jáne basqa da túrler. Platforma erekshe bilim berý qajettilikteri bar adamdar úshin ınterfeısti beıimdeý múmkindigin qarastyrady.
Jumysshy mamandyqtar jyly aıasynda platformada mektep túlekteri men TjKB stýdentterine arnalǵan kelesi kýrstar ornalastyryldy:
«Seniń mansaptyq bastamań: «Elektrondyq eńbek bırjasyn» qalaı paıdalanýǵa bolady» jáne «Tvoı karernyı start: kak ıspolzovat «Elektronnýıý bırjý trýda»». Atalǵan kýrstar mamandyqtar álemindegi praktıkalyq jolsilteme retinde qyzmet etedi: bolashaq mamandyqty tańdaýǵa, jumys izdeý men ózin tanystyrý daǵdylaryn meńgerýge, sondaı-aq elektrondyq eńbek bırjasynyń quraldaryn tıimdi paıdalanýǵa kómektesedi. Erekshe nazar mansap jolyn bastaýda jıi kezdesetin qatelikterden qalaı aýlaq bolýǵa bólingen.
Búgingi kúni bul kýrstardan 529 myń mektep oqýshysy men stýdent ótken, bul jobanyń joǵary suranysqa ıe ekenin jáne mańyzdylyǵyn dáleldeıdi.
Kýrs avtorlary úshin sabaqtardy qurastyrýǵa arnalǵan yńǵaıly konstrýktor, jarıalanǵan kýrstardyń statısıkasy men tıimdiligin kórý múmkindigi, sertıfıkattardyń ártúrli dızaıny, sondaı-aq oqytý qunyn aldyn ala esepteýge arnalǵan onlaın-kalkýlátor qoljetimdi.
Eske salaıyq, 2023 jylǵy jeltoqsannan bastap kýrstardan Enbek mobıldi qosymshasy arqyly da ótýge bolady. Qosymshany Google Play jáne App Store dúkenderinen júkteýge bolady.
Skills Enbek platformasynda tirkelý jáne jumys isteý máseleleri boıynsha «ERDO» AQ jaýapty qyzmetkerlerine 8 (7172) 95 43 17 telefony arqyly (ishki nómirler: 405, 441, 363) habarlasýǵa bolady.