Halyqaralyq Vogue jýrnaly 2025 jyly redaksıasy aralap kórgen álemdegi eń úzdik 14 týrısik baǵyttyń tizimine Qazaqstandy qosty, - dep habarlaıdy Aqshamnews.kz.
Bedeldi reıtıńte elimiz London, Sardınıa, Barselona jáne Palm-Sprıngs syndy jahandyq týrısik ortalyqtarmen qatar ataldy. Maqalada Almaty qalasyna erekshe nazar aýdarylǵan.
Vogue redaksıasy Almatyny zamanaýı qalalyq orta men kórkem tabıǵat úılesim tapqan, aıqyn kontrasttarǵa toly qala retinde sıpattaıdy. Materıalda İle Alataýynyń etegindegi keńestik kezeń sáýleti, damyǵan gastronomıalyq mádenıet jáne qazaqtyń ulttyq asqanasy erekshe atalady.
«Alǵashqy kúnderimdi kontrasttarǵa toly qalany aralaýmen ótkizdim: İle Alataýy aıasyndaǵy keńestik dańǵyldar, zamanaýı dámhanalar men dástúrli qazaq dúkenderi bir keńistikte toǵysqan», — dep jazady materıal avtory, kreatıvti damý jónindegi menedjer Alı Farýkı.
Sondaı-aq, Almaty óńirdi aralaýǵa, sonyń ishinde kórshiles Qyrǵyzstanǵa saparlaýǵa qolaıly bastapqy núkte retinde kórsetiledi. Materıal avtordyń alǵan áserine jáne Ortalyq Azıa boıynsha jasaǵan saıahatyna negizdelgen.
Vogue nusqasy boıynsha úzdik 14 týrısik baǵyttyń qataryna Almatynyń enýi qalaǵa degen halyqaralyq qyzyǵýshylyqtyń artyp kele jatqanyn aıǵaqtap, Qazaqstannyń álemdik týrısik kartadaǵy ornyn nyǵaıta túsedi. Aldyn ala boljamǵa sáıkes, 2026 jyly Almatyǵa 800 myńnan astam sheteldik týrıs kelýi múmkin.