Almaty qalasy boıynsha Qarjylyq monıtorıń agenttiginiń departamenti "Amir Capital" atty qarjy pıramıdasyn qurý jáne ony basqarý deregi boıynsha tergeý júrgizip jatyr, - dep habarlaıdy Aqshamnews.kz tilshisi. Bul týraly agenttiktiń baspasóz qyzmeti málimdedi.
Resmı málimetke sáıkes, ózin halyqaralyq ınvestısıalyq qor retinde kórsetken "Amir Capital" kompanıasy úsh jyl boıy Qazaqstan, Belarýs, Reseı jáne Qyrǵyzstan azamattarynan krıptovalúta saýdasy, maınıng jáne túrli jobalarǵa ınvestısıalaý arqyly 5–10% tabys ýáde etip, qarjy tartqan.
Investorlar kompanıanyń resmı saıty arqyly joldanǵan referaldy siltemeler boıynsha tirkelgen. Qarajat USDT, BTC, ETH sıaqty krıptovalúta túrinde Amir Wallet ámıanyna aýdarylyp otyrǵan.
Agenttiktiń málimetinshe, túsken qarajat qarjy pıramıdasynyń klasıkalyq prınsıpimen bólingen. Buryn tirkelgen qatysýshylarǵa tólemder keıingi salymshylardyń aqshasynan tólenip kelgen. Osy josparmen 40-tan astam adam tartylǵan.
2021 jyldyń sońynda salymshylardyń "amir.capital" platformasynan qarajat shyǵarý múmkindigi toqtatylǵan. Uıymdastyrýshylar tehnıkalyq aqaý degen jeleýmen tólemderdi qaıta bastaıtynyn aıtqanymen, qarajat qaıtarylmaǵan.
Tergeý barysynda quny 10 mln AQSH dollarynan asatyn krıptoaktıvter jáne Almaty oblysyndaǵy jer telimi buǵattaldy. Kúdiktilerdiń biri sot sanksıasymen eki aıǵa qamaýǵa alyndy.
QMA tergeýdi jalǵastyryp jatyr. QR Qylmystyq-prosestik kodeksiniń 201-babyna sáıkes ózge derekter jarıalaýǵa jatpaıdy.