Almaty qalasynyń Tótenshe jaǵdaılar departamentinde Qazaqstan-Brıtan tehnıkalyq ýnıversıtetiniń ǵımaratyndaǵy órtti joıýǵa qatysqan qyzmetkerlerdi saltanatty túrde nagradtaý rásimi ótti.
İs-sharaǵa TJD basshylyǵy men jeke quramy, sondaı-aq QBTÝ rektory Maratbek Ǵabdýllın men ınfraqurylym jónindegi prorektor Salavat Bektemisov qatysty, dep habarlaıdy aqshamnews.kz TJM-ge silteme jasap.
Tótenshe jaǵdaılar mınıstriniń buıryǵymen QBTÝ ǵımaratynda órtti sóndirý kezinde qyzmettik mindetterin adal atqarǵany úshin «Órtte kórsetken qaısarlyǵy úshin» medaldarymen nagradtaldy:
Mýsın Dıas Radıuly - Órt sóndirý jáne avarıalyq-qutqarý jumystaryn uıymdastyrý basqarmasynyń bastyǵy;
Magamedov Kamıl Mahmýtjanovıch - Órt sóndirý jáne avarıalyq-qutqarý jumystaryn uıymdastyrý basqarmasynyń bas mamany;
Súleımanov Rýslan Bahtıaruly - Jetisý aýdanynyń TJ basqarmasy № 12 órt sóndirý bóliminiń bólimshe komandıri;
Álıasqarov Darhan Jaqytbekuly - Almaly aýdanynyń TJ basqarmasy № 9 órt sóndirý bóliminiń aǵa órt sóndirýshi-qutqarýshysy;
Nuǵymanov Qanatbek Talǵatuly - Áýezov aýdanynyń TJ basqarmasy № 6 mamandandyrylǵan órt sóndirý bóliminiń órt sóndirý avtomobılin júrgizý jónindegi nusqaýshysy;
Taldybaev Baqytjan Baqytbergenuly - Medeý aýdanynyń Tótenshe jaǵdaılar basqarmasy № 5 mamandandyrylǵan órt sóndirý bóliminiń órt sóndirýshi-qutqarýshysy.
QBTÝ rektory Maratbek Ǵabdýllın qutqarýshylarǵa janqıarlyq jumystary úshin alǵysyn bildirdi: «Sizderdiń kúsh-jigerlerińizdiń arqasynda órttiń aýyr saldaryn boldyrmaı, Qazaqstannyń mádenı jáne bilim berý murasynyń mańyzdy bóligi bolyp tabylatyn bizdiń tarıhı ǵımaratymyzdy saqtaýǵa múmkindik týdy. Biz sizderge óz isterińizge jáne Otan aldyndaǵy adal qyzmetterińiz úshin rızamyz. Sizderdiń janqıarlyq jumystaryńyzdyń arqasynda biz qala turǵyndary, ózimizdi qaýipsiz sezinemiz, erteńgi kúnge senimimiz mol. Sizder bizdiń qaýipsizdigimiz úshin bastaryńyzdy kún saıyn qaýip-qaterge tigetin naǵyz batyrlarsyzdar!»
Ýnıversıtet ujymy atynan alǵys retinde qutqarýshylarǵa estelik kádesyı – Ǵımarattyń hrýstal maketi tabys etildi.
Eske salaıyq, 11 qańtarda saǵat 22.10-da bes qabatty QBTÝ ǵımaratynda 120 sharshy metr alańda órt oryn aldy. Qutqarýshylar joǵarǵy rang boıynsha oqıǵa orynyna jedel jetip, tórt jaýyngerlik ýchaskedegi órtti sóndirýge kiristi. Ǵımarat qurylysynyń erekshelikteri, joǵary órt júktemesi jáne qatty tútin órt sóndirý jumystaryn qıyndatty. Oqıǵa ornynda TJD basshylyǵymen jedel shtab óristetildi, Qazaqstan TJM Komandalyq ortalyǵy jumysty onlaın úılestirdi.
Órt sóndirýshilerdiń úılesimdi áreketteriniń arqasynda tarıhı ǵımarat qutqaryldy. Órtti oqshaýlaý kezinde ákimshilik ǵımarattyń tóbesinen Qazaqstannyń Týy zaqymdalmaı tómenge túsirildi. Órtti sóndirýge Almaty qalasy TJD 80 qyzmetkeri men 28 birlik tehnıkasy jumyldyryldy.