Otandyq ǵylymnyń jetistigin dáripteý
Otandyq QazVac vaksınasynyń úshinshi kezeń boıynsha klınıkalyq zertteý jumysy aıaqtaldy. Bul týraly Bıologıalyq qaýipsizdik problemalarynyń ǵylymı-zertteý ınstıtýtynyń bas dırektory, koronavırýsqa qarsy QazVac qazaqstandyq vaksınanyń avtory Kúnsulý Zakará málim etti, dep habarlaıdy Almaty-akshamy.kz QazAqparatqa silteme jasap.
«Búginde úshinshi kezeń boıynsha barlyq klınıkalyq zertteý aıaqtalyp, 9 shilde kúni sońǵy taldaý nátıjesi alyndy. Shildeniń sońyna deıin taldaý nátıjesi taǵy bir óńdelip, málimetterdiń statısıkasy jasaldy. Bul jumysqa 3 myń adam qatysyp otyr. Sondaı-aq, shildeniń sońynda klınıkalyq zertteýdiń qorytyndy esebi ázirlendi. Qazirgi kúni qorytyndy esep Dárilik zattar men medısınalyq buıymdardy saraptaý ulttyq ortalyǵynyń saraptaýynan ótip jatyr, onyń nátıjesi áli kelgen joq. Degenmen bizdiń ázirlegen esepke qarap, alǵash otandyq vaksınany klınıkalyq zertteý sátti júrgizildi dep aıtýǵa bolady», - dedi Kúnsulý Zakará.
Sondaı-aq, otandyq ǵalym QazVac-tyń úshinshi kezeńine qatysty qorytyndy esep oń baǵa berilgen jaǵdaıda otandyq vaksına týraly ǵylymı maqalalardyń jaryq kóretinin aıtty. Qazaqstandyq vaksınanyń avtory Kúnsulý Zakarányń aıtýynsha, QazVac-tyń úshinshi kezeńi boıynsha barlyq klınıkalyq zertteý esebin Dárilik zattar men medısınalyq buıymdardy saraptaý ulttyq ortalyǵy maquldaǵan jaǵdaıda, qazaqstandyq vaksına týraly kópke tanymal jýrnaldarǵa maqala jarıa etilmek. Ondaǵy maqsat - otandyq ǵylymnyń jetistigin dáripteý.