Qurylysyna 9 mlrd teńge bólingen otandyq vaksına shyǵaratyn zaýyt 2021 jyly shilde aıynda iske qosyldy.
Ol týraly Densaýlyq saqtaý vıse-mınıstri Aıjan Esmaǵambetova aıtty, dep habarlaıdy Almaty-akshamy.kz
Vıse-mınıstr Dúnıejúzilik densaýlyq saqtaý uıymy koronavırýsqa qarsy QazVac vaksınasyna ne sebepti kýálik bermegenin túsindirdi.
DDSU-nyń tártibi boıynsha vaksınany shyǵarýdyń tolyq tizbegi bolýy kerek. Bul degenimiz QazVac shyǵarylatyn zaýytta ekpeniń bıomassasynan bastap vaksınany quıý men qaptaý de jolǵa qoıylýy shart.
"Qazirgi kezde vaksınany quıý jelisine GMP-kýálik bar. Nysannyń ekinshi keshenin salý jumystary aıaqtalýǵa jaqyn. Sol jerde bıomassa jasalady. Qurylys tolyǵymen aıaqtalǵannan keıin taǵy bir GMP-kýálik beriledi, sodan keıin Dúnıejúzilik densaýlyq saqtaý uıymynyń kýáligin alýǵa múmkindik bolady", - dedi Esmaǵambetova.
Onyń aıtýynsha, zaýytta basqa vaksına shyǵarylsa da, oǵan da halyqaralyq kýálik alýǵa bolady.
"Kez kelgen bıofarmasevtıkalyq zaýyttyń qurylysy – óte kúrdeli proses. Oǵan joǵary talaptar qoıylady, ony oryndaý úshin kóp ýaqyt kerek. Degenmen biz zaýyttyń qurylysyn jáne birinshi jelisin iske qosýdy az ýaqyttyń ishinde iske asyrdyq", - dep atap kórsetti vıse-mınıstr.
Buǵan deıin densaýlyq saqtaý mınıstri Ajar Ǵınıat DDSU-nyń QazVac-ty ne sebepti tirkemegenin aıtqan. Onyń sózine qaraǵanda, vaksınany óndirýshiler uıymnyń sharttaryn oryndamaǵan.