Túrksib aýdanynyń turǵyndarymen kezdesýde Almaty ákimi Erbolat Dosaevqa trotýarlar men joldardy qardan tazartý sapasy jaıly suraq qoıyldy.
Almaty ákimi Erbolat Dosaevtyń jaýaby: Kólik keptelisi, kólik leginiń tyǵyzdyǵyna qaramastan birer kún buryn jaýǵan 27 sm qardy kúreýde sapaly jumys istep jatyrmyz. Magıstraldyq kósheler men aıaldamalar kúreldi, trotýarlardyń qaryn jınaýdy aıaqtap kelemiz.
Men qalany únemi aralaımyn, ásirese qar jaýǵannan keıin kóshedegi qar shyǵarý jumystaryn kóremin. Keshe, tańerteńgi saǵat 8-de qar jaýýy toqtaǵan kezde, biz árıne, qarbalas ýaqyt bastalǵanǵa deıin bárin jınap úlgere almadyq (artyq trafık jasamas úshin qarbalas ýaqytta qar kúreıtin tehnıkalar magıstraldarda jumys istemeıdi - red.). Jumysshylar qar jınaýǵa shyqty, jumys toqtamady. Bir túnniń ózinde qaladan 10 myń tekshe metrden astam qar shyǵaryldy.
Esterińizge sala keteıik, 16 qańtar kúni saǵat 22:30-dan 17 qańtar kúni tańǵy saǵat 09:00-ge deıin Almatyda qar jaýdy. Túnde jaýǵan qardy 30 qar tıegish, 11 avtogreıder jáne 83 ózi túsirgishpen shyǵaryldy. Qazir jol shetindegi jıektastardyń qaryn shyǵarý jumystary kúsheıtildi. Qar jaýa bastaǵannan beri 3177 tonna kóktaıǵaqqa qarsy materıaldar paıdalanyldy. 430-dan astam jınaý mashınalary trotýarlardy, jalpy paıdalaný oryndaryn, áleýmettik mańyzy bar nysandardyń kireberisin tazalaıdy. Aıaldamalar men jer ústi ótkelderindegi qardy shyǵarýǵa 1 110 jumysshy jumyldyrylǵan.