Ál-Farabı atyndaǵy Qazaq ulttyq ýnıversıtetiniń Halyqaralyq qatynastar fakúlteti bazasynda «Memlekettik basqarý jáne turaqty damý: Qytaı men Ortalyq Azıa arasyndaǵy dıalog» atty Halyqaralyq forým ótti. 2025 jylǵy 28–29 mamyr kúnderi ótken forým Qytaı, Qazaqstan, Tájikstan jáne Qyrǵyzstannyń jetekshi sarapshylaryn, dıplomattaryn jáne ǵalymdaryn bir alańǵa biriktirdi.
İs-shara Qytaı Halyq Respýblıkasyndaǵy Lanchjoý ýnıversıtetimen birlese otyryp, óńirdegi birqatar jetekshi ǵylymı jáne bilim berý mekemeleriniń qoldaýymen uıymdastyryldy.
Saltanatty ashylý rásimine ál-Farabı atyndaǵy Qazaq ulttyq ýnıversıtetiniń Basqarma múshesi, prorektory Abdrahman Tasybaev, Qytaı Halyq Respýblıkasynyń Almaty qalasyndaǵy Bas konsýly Szán Veı, sondaı-aq Gansý provınsıasy ákimshiliginiń ókilderi men Qytaıdyń Lanchjoý, Shyńjań pedagogıkalyq, Shanhaı saıası ǵylymdar jáne quqyq ýnıversıteti, Shensı ýnıversıteti, Fýdan ýnıversıteti jáne basqa da ǵylymı ortalyqtarynyń delegasıalary qatysty.
Ál-Farabı atyndaǵy QazUÝ prorektory Abdrahman Tasybaev forýmnyń Qazaqstan men Qytaı arasyndaǵy strategıalyq seriktestik baılanystardy nyǵaıtýǵa arnalǵan mańyzdy platforma retindegi mańyzdylyǵyna nazar aýdardy. Ol kóterilgen máselelerdiń ulttyq strategıalyq damýdyń negizgi aspektilerimen tikeleı baılanysty ekenin atap ótip, bul is-sharanyń eki eldiń syrtqy saıasat jáne ekonomıkalyq strategıasynyń ajyramas bóligi ekenine toqtaldy.
Qytaıdyń Almatydaǵy Bas konsýly Szán Veı óz sózinde Qytaı men Ortalyq Azıa elderi ulttyq jańǵyrý aıasynda ortaq maqsattar men múddelerdi bólisetinine nazar aýdardy. Ol memlekettik basqarý jáne turaqty damý salalaryndaǵy yntymaqtastyqty nyǵaıtýdyń mańyzdylyǵyn atap ótip, Ortalyq Azıa elderiniń jańǵyrtýǵa degen umtylysyna qurmet bildirip, Qytaıdyń shynaıy seriktestik negizinde damý tájirıbesimen bólisýge daıyn ekenin jetkizdi.
Lanchjoý ýnıversıtetiniń vıse-prezıdenti Sha Iýnchjýn Qytaı men Ortalyq Azıa elderi, sonyń ishinde Qazaqstan arasyndaǵy seriktestik turaqty damý men óńirlik ekonomıkalyq órkendeýdiń mańyzdy faktory ekenin rastady. Ol bilim men ǵylymı jetistiktermen almasý ózara árekettestikti tereńdetip, ǵylymı-tehnıkalyq ınovasıalardy damytýǵa jáne ortaq bolashaq qaýymdastyǵyn qalyptastyrýǵa yqpal etetinin erekshe atap ótti. Ǵalamdyq geosaıası ahýal jaǵdaıynda ǵylym men tehnologıa salasyndaǵy yntymaqtastyq aımaqtyq baılanystardy nyǵaıtyp, óńirdiń básekege qabilettiligin arttyrady.
Forým baǵdarlamasy aıasynda plenarlyq otyrystar, taqyryptyq seksıalar men saraptamalyq pikirtalastar ótti. Onda qorshaǵan ortany qorǵaý salasyndaǵy halyqaralyq-quqyqtyq retteý, memlekettik basqarýdyń sıfrlyq transformasıasy, jańartylatyn energıa kózderin damytý jáne turaqty damýdy quqyqtyq qamtamasyz etý máseleleri qaraldy.
Forýmǵa qatysýshylar akademıalyq yntymaqtastyqty keńeıtýge, birlesken bilim berý baǵdarlamalaryn iske qosýǵa, stýdenttik almasýdy damytýǵa jáne jastardy BUU-nyń Turaqty damý maqsattaryn (TDM) júzege asyrýǵa belsendi tartýǵa erekshe nazar aýdardy.
Forýmnyń ótkizilýi Eýrazıalyq keńistiktegi ǵylymı jáne mádenı yntymaqtastyqty nyǵaıtý jolyndaǵy mańyzdy qadamǵa aınalyp, zamanaýı halyqaralyq zertteý kún tártibin qalyptastyrýda ýnıversıtetaralyq ózara is-qımyldyń mańyzdylyǵyn rastady.