Ál-Farabı atyndaǵy Qazaq ulttyq ýnıversıteti sý tasqyny bolyp jatqan Batys Qazaqstan oblysyna 5 mln teńgege 20 tonna gýmanıtarlyq kómek jiberdi.
Sondaı-aq sý tasqynynan úıleri zardap shekken 50 stýdentke 100 myń teńgeden járdemaqy taǵaıyndady. Jınalǵan kómektiń jalpy sommasy 10 mln teńgeni quraıdy, dep habarlaıdy Almaty-akshamy.kz JOO-nyń baspasóz qyzmetine silteme jasap.
9 sáýir kúni Ál-Farabı atyndaǵy Qazaq ulttyq ýnıversıtetiniń Basqarma Tóraǵasy – Rektory Janseıit Túımebaevtyń bastamasymen oqý ordasynyń bazasynda arnaıy qaıyrymdylyq pýnkti ashylǵan bolatyn.
Aksıaǵa ýnıversıtettiń oqytýshylary men qyzmetkerleri, bilim alýshy jastar belsendi atsalysty.
Gýmanıtarlyq kómek tiziminde jańa kıim-keshekter, azyq-túlik, jeke gıgıena quraldary, karemattar, buzylmaıtyn taǵamdar, aýyzsý, tósek-oryn jabdyqtary, rezeńke etikter men qolǵaptar jáne t.b. qajetti zattar bar.
Onyń ishinde 250 qalyń tósenish, 500 kórpe, 300 jastyq, 700 súlgi, 400 kir sabyn, 500 lıtr suıyq sabyn bar. Sondaı-aq 1300 keli makaron ónimderi, 200 keli qaraqumyq, 500 keli kúrish, 200 keli qant sıaqty uzaq saqtalatyn taǵam túrleri jóneltildi.
Úıleri sýǵa ketken jáne qalpyna keltirýge jaramsyz stýdentterdi qoldaý qarajaty jeke ózderine aýdarylady.
