Aksıanyń baǵasy shamamen 8 406 teńge bolmaq.
«QazMunaıgaz» kompanıasy aksıalaryn halyqtyq İRO-ǵa shyǵarýǵa jol ashatyn Úkimet qaýlysy jarıalandy, dep habarlaıdy Almaty-akshamy.kz QazAqparatqa silteme jasap.
«Samuryq-Qazyna» ulttyq ál-aýqat qory» aksıonerlik qoǵamy zańnamada belgilengen tártippen «QazMunaıGaz» ulttyq kompanıasy» aksıonerlik qoǵamynyń ornalastyrylǵan aksıalarynyń jalpy sanynyń 15,42 paıyzynan aspaıtyn, kompanıanyń 94 109 125 (toqsan tórt mıllıon bir júz toǵyz myń bir júz jıyrma bes) jaı aksıasyn qordyń jalǵyz aksıoneriniń sheshimimen bekitiletin qordyń dırektorlar keńesiniń sheshimimen aıqyndalatyn baǵa, san jáne qurylym boıynsha ıelikten shyǵarsyn» delinedi QR Premer-Mınıstri Álıhan Smaıylov qol qoıǵan qaýlyda.
Qaýly alǵashqy resmı jarıalanǵan kúninen bastap qoldanysqa engiziledi.
Aıta keterligi, taıaýda «Samuryq-Qazyna» AQ basqarma tóraǵasy Almasadam Sátqalıev qor «QazMunaıGazdyń» 30 505 974 jaı aksıasyn satýǵa nıetti ekenin aıtqan edi.
Bul rette bir jaı aksıanyń baǵasy shamamen 8 406 teńge bolmaq.