Almaty ákimi Erbolat Dosaev Áýezov aýdanynyń turǵyndarymen kezdesýde ákimdik áleýmettik osal azamattarǵa tarıftiń ósýin óteıtinin, bul maqsatqa qarajat qalalyq búdjetten bólingenin málimdedi, dep habarlaıdy aqshamnews.kz
«Qoldaýǵa muqtaj turǵyndarǵa arnalǵan arnaıy baǵdarlama qalada eki jyldan astam ýaqyt buryn iske qosylǵan. Áleýmettik osal sanattaǵy azamattar aýdandyq basqarmalarǵa júginip, qajetti kómek ala alady. Bul maqsatqa qarajat búdjette qarastyrylǵan», – dedi Erbolat Dosaev.
Qala basshysy qazirgi komýnaldyq tarıfter áli de aıtarlyqtaı sýbsıdıalanatynyn atap ótti. Ákimdikke sýdy tutyný boıynsha saralanǵan tólemge qatysty kóptegen suraq kelip túsedi.
«Ókinishke qaraı, qalada sý eseptegish qurylǵylary joq turǵyndardyń úlesi joǵary. Sondyqtan biz saralanǵan tólem júıesin engizdik: eseptegishi barlar bir tarıfpen tóleıdi, al eseptegishi joqtar kóterilgen norma boıynsha eseptesedi. Bul arqyly biz turǵyndardy eseptegish ornatýǵa yntalandyrǵymyz keldi», – dedi ákim.
Sonymen qatar, qala basshysy Almaty jylý jelilerimen birlesip, kópqabatty úılerdegi jylý esepteý toraptaryn jańǵyrtý baǵdarlamasy bastalǵanyn aıtty.
Aıta keteıik, Almaty ákimdigi áleýmettik osal azamattarǵa tarıfterdiń ósýin óteıdi. Jumyspen qamtý jáne áleýmettik baǵdarlamalar basqarmasynyń málimetinshe, qoldanystaǵy tólem júıesi komýnaldyq qyzmet tarıfteriniń kóterilýin tolyqtaı óteıdi.
Tarıfterdiń ózgerýin Almaty boıynsha Tabıǵı monopolıalardy retteý komıteti departamenti bekitken.
2023 jyldyń shilde aıynan bastap iske asyrylyp jatqan «Investısıa ornyna tarıf» baǵdarlamasy aıasynda ótemaqy algorıtmi engizildi, ol áleýmettik osal azamattardyń toǵyz sanatyn qamtıdy. Olardyń qataryna ardagerler, múmkindigi shekteýli azamattar, kópbalaly otbasylar, zeınetkerler jáne qoldaýǵa muqtaj basqa da sanattar kiredi. 2024 jyldyń qańtaryndaǵy málimetke sáıkes, ótemaqy alýshylar sany – 141,7 myń adam, kórsetilgen kómek kólemi – 5,4 mlrd teńge.
Qala úshin áleýmettik osal sanattaǵy turǵyndardy qoldaý basymdyq bolyp qala beredi.