Ǵalym úndeý tastady.
Táýelsizdiktiń 30 jyldyǵy – eleýli beles, biraq qoǵamnyń sanasy áli de transformasıalanyp jatyr. Babalarymyz «Qasqyr óz jarasyn jalap jazady» dep beker aıtpaǵan, biz qatelikten sabaq ala bilýimiz qajet. Memleket basshysynyń tóraǵalyǵymen ótken Qazaqstan halqy Assambleıasynyń «El birligi – jańarǵan Qazaqstannyń tiregi» sesıasynda Eýrazıa ulttyq ýnıversıtetiniń prorektory, ǵalym Dıhan Qamzabekuly osyndaı oılaryn bildirdi, dep habarlaıdy Almaty-akshamy.kz.
Qazirgi jumyssyzdyqtyń kózi mamanǵa degen qısyndy monıtorıń pen tapsyrystyń joqtyǵynda ekenine toqtalǵan ǵalym álemde gýbernator, prefekt, ákim óz aýmaǵyna qandaı maman kerek ekenin ýnıversıtetpen birigip sheshetin ıgi tájirıbe baryn aıtty.
«Men joǵary oqý ornynda 30 jyldaı qyzmet isteımin. Dál osy máselemen ýnıversıtetke kelgen birde-bir ákimdi kórgen joqpyn. Mine, máseleniń bir kiltıpany», – dep qazirgi tańdaǵy ózekti máseleni qozǵady ol.
Osy máseleni sheshý úshin Dıhan Qamzabekuly jastardyń boıynda «qoǵamǵa degen jaýapkershilik ımýnıtetin» qalyptastyrýdy bilim salasy mamandary kásibı boryshy retinde sanaýy kerek ekenin aıtty. Sonymen qatar, eńbek kúshin áleýmettik turǵydan qoldaý arqyly ıkemdi el ekonomıkasynyń damýyna qajetti jumystarǵa tartýdy kózdeıtin «fleksıkúrıtı» (flexicurity) prınsıpine súıengen eńbek naryǵy reformasyn júrgizý qajet.
Jastardy jańa isterge jigerlendirý úshin bilim, mádenıet, bılik oryndary birlesip qoǵamda elshil ata-ana qalyptastyrýǵa aıryqsha mán berýi mańyzdy. Mysaly, elordadaǵy mýzeılerge, qazaq, orys teatryna birde-bir ret barmaǵan ata-analar az emes. Ata-ananyń júrek kózi ashylmasa, balanyń júrek kózi qalaı ashylady?
«Qazir eldegi etnostardyń sanyn aıtý, jarnamalaý kókeıkesti emes, «Qazaqstan birtutas!» degen uǵymdy, túsinikti ornyqtyrý kókeıkesti. «Qazaqstanda eshkim tegine, jynysyna, ultyna, násiline, tiline, dinine qarap bólinbeıdi!» degen shynaıy tezıs mándi. Ultymyzdyń bir danasy Máshhúr-Júsip Kópeıuly «Kúlli denege kúsh berip turatuǵyn – júrek» degen eken. Alash leksıkonynda da «aqjúrek» sózi jıi kezdesedi. Munyń bári - Qasym-Jomart Kemeluly kún tártibine qoıǵan ádilettilik, sabaqtastyq, órleý uǵymynyń arqaýy», – dedi ol.
"Endeshe shynaıylyqqa qushtar, ásiremaqtannan ada, sózi men isi bir jerden shyǵatyn qoǵam bolýdan jańylmaıyq!" - degen úndeý tastady ǵalym.