Amerıka azamaty Hamısh Paýls Kishi júzdiń 4 taıpasyn, 31 rýyn túgel jatqa biledi.
Hamısh Paýls 2017 jyldan beri Atyraýda turady. Osy ýaqyt ishinde ol qazaq halqynyń salt-dástúri men mádenıetine qanyǵyp úlgergen, dep habarlaıdy Almaty-akshamy.kz.
Hamısh «Teńizshevroıl» JSHS Úkimet jáne qoǵammen baılanys departamenti bas menedjeriniń orynbasary bolyp jumys isteıdi. Jyl saıyn áriptesterimen birge dástúrli Naýryz merekesin toılaıdy. Ol bul merekeni jaqyndardyń basyn qosatyn tamasha mereke dep biledi.
Oǵan bul kúni kópshiliktiń ulttyq kıimmen júretini erekshe unaıdy. Oıýmen kómkerilgen ulttyq naqyshtaǵy kıimder kózdiń jaýyn alatynyn aıtady.
«Maǵan baýyrsaq, kóje unaıdy. Mende tipti qazaqtyń ulttyq kıimi bar, maǵan ony syıǵa tartqan. Ol kıimdi erekshe is-sharalarǵa kıemin. Onyń oıýlary men tústeri kóńil-kúıdi kóteredi. Qazaqstan men buryn barǵan elderden erekshe. Mundaǵy adamdar óte meıirimdi, qonaqjaı. Al bul eldiń tabıǵaty, tipti tamasha», deıdi Hamısh.
Ol bos ýaqytynda qazaq halqynyń rýlary jaıynda oqıdy.
«Meni bir halyqtyń rý tarmaqtarǵa qalaı bólinetini qyzyqtyrady. Men Qazaqstandaǵy 200-den astam rýmen tanysyp shyqtym. Ázirge Kishi júzdiń rýyn ǵana bilemin», deıdi ol.
Halqymyzdyń salt-dástúrinen bólek, ol qazaqtyń ulttyq oıyndary men mýzykalyq aspaptaryna da qyzyǵady. Mysaly, ol jaqynda asyq atý men láńgi tebýdi úırendi. Hamısh asyq atý uqyptylyqqa, alǵyrlyqqa, tapqyrlyqqa durys esepteýge úıretse, láńgi dáldik pen eptilikti damytady deıdi.
«Maǵan bul oıyndardy kenje ulym úıretti. Ol da Atyraý qalasynda turady. Bul oıyn túrlerin ol mektepten úırenip keldi. Al 15 jastaǵy balam dombyra tartýdy úırendi. Ol mýzyka mektebinde oqıdy, qazir 6 kúıdi sherte alady. Súıikti kúılerimiz - «Adaı», «Balbyraýyn». Meniń túsinýimshe, bul Atyraýdaǵy eń tanymal týyndylar», dep túıindedi ol.