Mamaı Ahetovtyń úsh tomdyq eńbegi jaryq kórdi
Sóz óneri kúlli óner ataýlynyń bastamasy ekeni belgili. Al kisiniń kisiligin, tipti qarym-qabiletin sózinen tanyǵan qazaq sóz ónerin, ásirese, sheshendik ónerdi bárinen bıik qadirlegen halyq. Aýyzy sózge jarymaǵan adamǵa el tizginin de ustatpaǵan. Eldiń qamyn da, erdiń taǵdyryn da sózben sheshken. Qastasqandy qylyshsyz kesip, daýdan-jaýdan qyzyl tilmen qorǵaı alatyn asyly bekzat ónerdi aıryqsha baǵalaǵan. Áne, sondaı ult murasy ár kezde túrli deńgeıde zerttelip, zerdelenip te keledi. Sonyń ózinde taý-teńiz qazynasy túgel aqtarylyp, taýysa zerttelip boldy dep aıta almaımyz.
Kúni keshe ǵana «Qazaqtyń sheshendik óneri» atty úsh tomdyq qomaqty eńbek osy salanyń keń aıdynyna kelip qosyldy. Bul eńbek ádebıet zertteýshi, fólklortanýshy ǵalym Mamaı Ahetovtyń 30 jylǵa jýyq eńbeginiń nátıjesi. Úsh tom eńbektiń tusaýy «Áýezov úıinde» kesildi.
Aıryqsha ataı keteıik, qazaqtyń sheshendik óneri men aýyzeki sóıleý dástúrin monografıalyq sıpatta qarastyratyn bul eńbekti QR ǴJBM Ǵylym komıteti M.O.Áýezov atyndaǵy Ádebıet jáne óner ınstıtýtynyń Ǵylymı keńesi usynyp otyr.
Ǵylymı eńbektiń tusaýkeser sharasyna ultymyzdyń sóz ónerin zerttep-zerdelegen ǵalymdar, óner men mádenıet ókilderi jáne BAQ ókilderi jınaldy. Qatysýshylar Mamaı Ahetovtyń ádebıet pen fólklortanýǵa qosqan súbeli eńbegin joǵary baǵalady. Ǵylymdaǵy qatarlas áriptesteri men qalamdastary eńbek avtorynyń atalǵan sala boıynsha uzaq jyl eńbek etip kele jatqanyn basa aıtyp ótti.
M.O.Áýezov atyndaǵy Ádebıet jáne óner ınstıtýtynyń bólim meńgerýshisi, f.ǵ.d. Gúljahan Orda bul eńbekke tereńdeı toqtalyp ótti. Onyń aıtýynsha, úsh tomdyq kólemdi eńbek sheshendik ónerdiń arǵy-bergi tarıhyn túgendegen, kórkemdik qyrlaryn taldaǵan. Sonymen birge, «sheshendik óner qazirgi zamanǵa qalaı jalǵasty?» degen saýalǵa da jaýap beretinin atap ótti. Ǵylymdaǵy qatarlasy bul eńbekti óziniń 30 jyldyq izdenisiniń nátıjesinde usynyp otyrǵanyn da basa belgiledi. Sondaı-aq, osy eńbektiń negizinde joǵary oqý oryndary úshin oqý quralyn qurastyrý týraly ıdeıasyn da ortaǵa saldy.
Qazaq ádebıeti men óneriniń bir dáýirdegi qara shańyraǵyna aınalǵan ortada ǵalymdar men qalamgerler qazaqtyń sheshendik óneri týrasynda da áńgimeledi. Jıynnyń tizginin ustaǵan atalǵan ınstıtýt dırektory, f.ǵ.d. Kenjehan Matyjanov jıyn taqyrybyna oraı birqatar sony oılaryn ortaǵa tastady. Ultymyzdyń sheshendik ónerin bıik baǵalaǵanyna qaramastan, qazirgi joǵary bılik ókilderi túrli sharalarda buǵan asa mán bermeı júrgenin aıta kelip, sheteldik tájirıbelerde bunyń ozyq úlgilerin tıimdi paıdalanyp otyrǵanyna mysaldar keltirdi.
Atalǵan eńbek fólklortanýshy, ádebıettanýshy mamandarǵa, joǵary oqý oryndaryndaǵy ustazdarǵa, sondaı-aq, JOO-daǵy pedagogıka, fılologıa, zań, dintaný fakúltetteriniń stýdentterine, jalpy kópshilik oqyrman qaýymǵa arnalǵan.